لاہور：وزیر اعلیٰ پنجاب مریم نواز شریف نے لاہور ڈیولپمنٹ پلان کے دوسرے فیز کا باقاعدہ آغاز کر دیا، جس کے تحت لاہور شہر کی 6,284 گلیوں کی مکمل اپ گریڈیشن کی جائے گی۔ آئندہ سال 30 جون تک لاہور میونسپل کارپوریشن کی 5,798 اور WASA کی 486 گلیوں کو جدید اور قابل فخر بنایا جائے گا۔
وزیر اعلیٰ کی زیر صدارت لاہور ڈیولپمنٹ فیز ٹو سے متعلق اجلاس میں تفصیلی بریفنگ دی گئی اور ضروری ہدایات جاری کی گئیں۔ اجلاس میں مرحلہ وار ماہانہ ورک پلان پیش کیا گیا تاکہ لاہور کا ہر محلہ روشن، آباد اور شہریوں کے لیے باعزت بنایا جا سکے۔
مریم نواز شریف نے کہا کہ لاہور کی ترقی میں معیار پر کوئی سمجھوتہ نہیں ہوگا اور فیز ٹو کی تکمیل میں کسی قسم کی تاخیر برداشت نہیں کی جائے گی۔ انہوں نے مزید کہا کہ 6 ہزار سے زائد گلیوں کی اپ گریڈیشن کے بعد لاہور کا ہر محلہ رہائش کے لیے فخر کی علامت بنے گا اور شہر کے کسی بھی کونے کو ٹوٹ پھوٹ سے آزاد بنایا جائے گا۔