نئی دہلی : دہلی کی تہاڑ جیل کے حکام نے عوامی اتحاد پارٹی (اے آئی پی) کے رہنما اور مقبوضہ کشمیر بارہمولہ سے رکن پارلیمنٹ انجینئر رشید کو، جو دہشت گردی کی فنڈنگ کے معاملے میں جیل میں بند ہیں، جیل نمبر 3 سے جیل نمبر ایک میں منتقل کر دیا ہے۔ ذرائع کے مطابق تقریباً دو ماہ قبل مبینہ طور پر ان پر حملہ کے بعد سیکوریٹی خدشات کے پیش نظر ایسا کیا گیا۔
میڈیا رپورٹس کے مطابق دہلی حکومت کے ایک اعلیٰ ذرائع نے بتایا کہ 58 سالہ رشید کو بدنام زمانہ تہاڑ کی سب سے پرانی جیل نمبر ایک میں منتقل کر دیا گیا ہے، جہاں انہیں تنہا وارڈ نمبر 9 کے ایک الگ سیل میں رکھا گیا ہے۔
۔ ذرائع نے بتایا کہ 2019 سے تہاڑ جیل میں بند رکن پارلیمنٹ پر کچھ قیدیوں نے مبینہ طور پر حملہ کیا تھا ۔
حکام نے بتایا کہ حملہ کے بعد رشید کے وارڈ کے ارد گرد نصب سی سی ٹی وی کیمروں کی مدد سے باقاعدہ جانچ پڑتال کی جا رہی ہے۔ ذرائع نے بتایا کہ رشید کو اسی سیل میں منتقل کیا جا رہا ہے جہاں دہلی کے سابق نائب وزیر اعلیٰ اور عام آدمی پارٹی کے لیڈر منیش سسودیا کو رکھا گیا تھا۔