لاہور : (حافظ نعیم سے ) پی ڈی ایم اے پنجاب کے مطابق دریائے راوی ،ستلج اور چناب میں شدید سیلابی صورتحال کے باعث 45سو سے زائد موضع جات متاثر ہوئے۔ ریلیف کمشنر نے بتایا کہ چناب میں سیلاب سے 2335 ، ستلج 672 اور راوی میں سیلاب کے باعث 1482 موضع جات متاثر ہوئے۔
دریاؤں میں سیلابی صورتحال کے باعث مجموعی طور پر 44 لاکھ 98 ہزار لوگ متاثر ہوئے جبکہ 24 لاکھ 51 ہزار لوگوں کو محفوظ مقامات پر منتقل کیا گیا ہے۔ متاثرہ اضلاع میں 396 ریلیف کیمپس اور 490 میڈیکل کیمپس جبکہ مویشیوں کو علاج معالجے کی سہولت فراہم کرنے کے لیے 405 ویٹرنری کیمپس قائم کیے گئے ہیں۔ حالیہ سیلاب میں مختلف حادثات میں 97 شہری جاں بحق ہوئے۔
ریلیف کمشنر کا کہنا ہے کہ منگلا ڈیم 93 فیصد جبکہ تربیلا ڈیم 100 فیصد تک بھر چکا ہے۔ دریائے ستلج پر موجود انڈین بھاکڑا ڈیم 88 فیصد اورپونگ ڈیم 94 فیصد جبکہ تھین ڈیم 89 فیصد تک بھر چکا ہے-