ٹیکسلا (شائستہ ضیاء):
ٹیکسلا کے قریب مالاکنڈ سٹاپ پر قائم منڈی مویشیاں کی اوپن نیلامی کا عمل کامیابی کے ساتھ مکمل ہو گیا ہے۔ ملک نثار اعوان آف بجاڑ نے سات کروڑ روپے کی سب سے بڑی اور آخری بولی دے کر تین سالہ ٹھیکہ اپنے نام کر لیا ہے۔کامیاب بولی کے بعد موصوف نے مقررہ قواعد و ضوابط اور قانونی تقاضوں کی تکمیل کرتے ہوئے تمام معاہدے پر دستخط کر دیے ہیں، جس کے بعد واہ کینٹ بورڈ کی جانب سے ان کے نام کامیابی کا باضابطہ نوٹیفکیشن بھی جاری کر دیا گیا ہے۔ معاہدے کی یہ مدت تین سال کے لیے مقرر کی گئی ہے، جس میں عیدالاضحیٰ کے موقع پر خصوصی مویشی منڈیاں قائم کرنے کا انتظام بھی شامل ہے۔ معاہدے کے تحت ٹھیکیدار کی یہ بنیادی ذمہ داری ہوگی کہ منڈی میں قربانی اور دیگر مویشیوں کی خرید و فروخت کے لیے آنے والے تاجروں، بیوپاریوں اور شہریوں کو تمام ممکنہ سہولیات فراہم کی جائیں۔ اس سلسلے میں جانوروں کے لیے مناسب سایہ، روشنی کے مؤثر انتظامات، صاف پانی کی فراہمی، صفائی ستھرائی کے بہترین انتظامات اور سکیورٹی کے فول پروف اقدامات کو یقینی بنانا بھی معاہدے کا لازمی حصہ قرار دیا گیا ہے۔ کاروباری و تجارتی حلقوں کے مطابق، سات کروڑ روپے کی یہ کامیاب نیلامی اس منڈی کی اہمیت اور اس شعبے میں سرمایہ کاری کے وسیع امکانات کو اجاگر کرتی ہے۔ اس امر کی توقع کی جا رہی ہے کہ بہتر انتظامی سہولیات اور منظم کاروباری ماحول کے فروغ سے نہ صرف مویشیوں کے تاجروں اور خریداروں کو سہولت میسر آئے گی، بلکہ منڈی کی مجموعی کارکردگی اور علاقائی تجارتی سرگرمیوں میں بھی نمایاں بہتری آئے گی۔