عمان
اے سی سی انڈر 19 ایشیا کپ 2026 کے افتتاحی میچ میں سری لنکا انڈر 19 ٹیم نے شاندار کارکردگی کا مظاہرہ کرتے ہوئے ملائیشیا انڈر 19 ٹیم کو ایک آسان مقابلے کے بعد 9 وکٹوں سے شکست دے دی ہے۔
العامرات کرکٹ گراؤنڈ میں کھیلے گئے اس میچ میں سری لنکا نے ٹاس جیت کر پہلے فیلڈنگ کرنے کا فیصلہ کیا۔ سری لنکن بولرز نے نپی تلی بولنگ کا مظاہرہ کرتے ہوئے ملائیشیا کی پوری ٹیم کو 28.1 اوورز میں صرف 88 رنز پر پویلین سمیٹ دیا۔ ملائیشیا کی جانب سے صیام العاقل (Syamil Aqil) نے ذمہ دارانہ بیٹنگ کرتے ہوئے 50 گیندوں پر 7 چوکوں اور 2 چھکوں کی مدد سے 51 رنز کی اننگز کھیلی اور ٹیم کے نمایاں اسکورر رہے، تاہم دیگر کوئی بھی کھلاڑی سری لنکن اٹیک کے سامنے ٹک نہ سکا۔ سری لنکا کی جانب سے کوشیکا کماراسنگھے (Kaushika Kumarasinghe) نے انتہائی تباہ کن بولنگ کرتے ہوئے صرف 30 رنز دے کر 5 کھلاڑیوں کو آؤٹ کیا، جبکہ ویگیشورن آکاش نے 3 وکٹیں حاصل کیں۔
جوب میں، سری لنکا انڈر 19 ٹیم نے 89 رنز کا آسان ہدف صرف 13.5 اوورز میں ایک وکٹ کے نقصان پر حاصل کر لیا۔ ریہان پیئرس (Rehan Peiris) نے شاندار جارحانہ انداز اپناتے ہوئے 45 گیندوں پر ناٹ آؤٹ 54 رنز (7 چوکے، 1 چھکا) بنائے، جبکہ سنوجا ویکوناگوڈا نے بھی 30 رنز کی ناٹ آؤٹ اننگز کھیلی۔ ملائیشیا کی جانب سے واحد وکٹ ناگیشوران ستھاناکماران نے حاصل کی۔
شاندار بولنگ پرفارمنس پر کوشیکا کماراسنگھے کو میچ کا بہترین کھلاڑی قرار دیا گیا۔ اس فتح کے ساتھ ہی سری لنکا نے ٹورنامنٹ کا آغاز شاندار انداز میں کر دیا ہے۔