سیالکوٹ( بیورو رپورٹ سلیم احمد اعوان شیخو)
وزیر اعلیٰ پنجاب مریم نواز شریف کی کسان دوست پالیسیوں کے تحت گرین ٹریکٹر سکیم کے چوتھے مرحلے میں ضلع سیالکوٹ کے کاشتکاروں میں 206 ٹریکٹرز کی تقسیم کا باقاعدہ آغاز کر دیا گیا ہے۔ اس سکیم کے تحت حکومت کی جانب سے ہر ٹریکٹر پر 7 لاکھ 50 ہزار روپے کی بھاری سبسڈی فراہم کی جا رہی ہے، جس کے تحت ضلع سیالکوٹ کے کسانوں کو مجموعی طور پر 15 کروڑ 45 لاکھ روپے کی سبسڈی دی جائے گی۔
اس سلسلے میں منعقدہ پروقار تقریب کے دوران ممبران صوبائی اسمبلی پنجاب چودہری فیصل اکرام اور نوید اشرف نے 14 خوش نصیب کاشتکاروں کو ٹریکٹرز کی چابیاں ان کے حوالے کیں۔ اس موقع پر ایڈیشنل ڈپٹی کمشنر ریونیو عباس ذوالقرنین اور اسسٹنٹ ڈائریکٹر زراعت رانا ارشاد بھی خصوصی طور پر موجود تھے۔
تقریب سے خطاب کرتے ہوئے اراکین صوبائی اسمبلی چودہری فیصل اکرام اور نوید اشرف نے کہا کہ وزیر اعلیٰ پنجاب مریم نواز شریف کی ولولہ انگیز قیادت میں صوبائی حکومت کسانوں کی خوشحالی اور زرعی شعبے کی ترقی کے لیے عملی اقدامات اٹھا رہی ہے۔ انہوں نے اس عزم کا اعادہ کیا کہ گرین ٹریکٹر سکیم کے ذریعے کاشتکاروں کو جدید زرعی مشینری کی فراہمی سے ملکی زرعی پیداوار میں خاطر خواہ اضافہ ہوگا اور کاشتکاری کے جدید طریقوں کو فروغ ملے گا۔
رہنماؤں نے مزید بتایا کہ حکومت پنجاب نے کسانوں کے مفاد میں گندم کی امدادی قیمت 4 ہزار 500 روپے فی من مقرر کی ہے جبکہ رواں سیزن کے لیے 30 لاکھ میٹرک ٹن گندم خریداری کا ہدف رکھا گیا ہے۔ کسان کارڈ کا اجراء، آسان قرضوں کی فراہمی اور جدید زرعی آلات کی تقسیم پر مشتمل یہ تاریخی زرعی پیکج وزیر اعلیٰ پنجاب کی کسان دوست سوچ اور کاشتکاروں کی فلاح و بہبود کے پختہ عزم کا واضح مظہر ہے۔