واشنگٹن:ٹیکنالوجی کی دنیا کے بانی اور طویل عرصے تک اس کے سب سے بڑے پرامید حامی سمجھے جانے والے مائیکروسافٹ کے بانی بل گیٹس نے انسانیت کو ایک خوفناک مستقبل سے خبردار کر دیا ہے۔ اتوار کو نشر ہونے والے معروف امریکی ٹی وی شو "میٹ دی پریس” (Meet the Press) کے ایک انٹرویو میں بل گیٹس یہ انتباہ جاری کریں گے کہ وہ ایک ایسا مستقبل دیکھ رہے ہیں جہاں مصنوعی ذہانت (AI) انسانیت کے خاتمے یا ایک ارب اموات کا سبب بن سکتی ہے۔
🚨 Bill Gates predicts that AI could “drive events that cause a billion deaths” pic.twitter.com/o1k6KqAkS4
— Chief Nerd (@TheChiefNerd) September 25, 2026
این بی سی نیٹ ورک کی جانب سے جمعہ کے روز جاری کردہ انٹرویو کے اقتباسات کے مطابق بل گیٹس کا کہنا ہے کہ "اے آئی اتنی طاقتور ضرور ہے کہ وہ ایسے واقعات کو جنم دے سکتی ہے جو ایک ارب اموات کا سبب بن سکتے ہیں۔” انہوں نے مزید کہا کہ اگرچہ سو فیصد تباہی تک پہنچنا مشکل ہو سکتا ہے، لیکن انسانی تاریخ میں اس سے پہلے کبھی کوئی ایسا ہتھیار نہیں دیکھا گیا جو بدنیتی رکھنے والے لوگوں کے ہاتھ میں جدید ترین اے آئی ٹولز کے امتزاج جتنا خطرناک ہو۔
یہ پہلا موقع نہیں ہے جب بل گیٹس نے اے آئی کے خطرات پر بات کی ہو۔ اس سے قبل اگست میں جاری کردہ ایک تفصیلی میمو میں بھی انہوں نے اے آئی کو تاریخ کی سب سے زیادہ اثر انگیز ٹیکنالوجی قرار دیتے ہوئے لکھا تھا کہ یہ یا تو اب تک کی سب سے بڑی مساوات پیدا کرنے والی طاقت بنے گی یا پھر ناانصافی کا سب سے بدترین ذریعہ ثابت ہوگی۔ انہوں نے خبردار کیا تھا کہ موجودہ رفتار اور راستے پر چلتے ہوئے اس کے منفی نتائج برآمد ہونے کے انتہائی قوی امکانات ہیں۔
بل گیٹس نے اس بات پر زور دیا ہے کہ دنیا بھر کی حکومتوں اور سیاسی جماعتوں کو اب باہمی تعاون کے ساتھ مل کر ایسے مؤثر ضابطے اور حفاظتی اقدامات وضع کرنے چاہئیں تاکہ مصنوعی ذہانت کو بے لگام ہونے اور دنیا کو ہلاکتوں کی طرف دھکیلنے سے روکا جا سکے۔