نیویارک / اقوام متحدہ:ورلڈ ٹریڈ سینٹر پر ہونے والے ہلاکت خیز دہشت گردانہ حملوں کی پچیسویں برسی کے موقع پر اقوام متحدہ کی سلامتی کونسل (UNSC) نے عالمی امن کو لاحق خطرات سے نمٹنے کے لیے انسدادِ دہشت گردی کی حکمت عملی کو فوری طور پر تبدیل کرنے کا مطالبہ کیا ہے۔ فرانس کی درخواست پر بلائے گئے اس اہم اجلاس میں سلامتی کونسل کے تمام 15 رکن ممالک نے متفقہ طور پر ایک پریس بیان جاری کیا اور حملوں کے متاثرین کی یاد میں ایک منٹ کی خاموشی بھی اختیار کی۔
اجلاس سے خطاب کرتے ہوئے سلامتی کونسل کے ارکان کا کہنا تھا کہ دہشت گردی آج بھی بین الاقوامی امن اور سلامتی کے لیے ایک ناسور بنی ہوئی ہے، تاہم اب خطرات کی نوعیت یکسر بدل چکی ہے۔ دہشت گرد تنظیمیں جدید دور کی ٹیکنالوجی جیسے کہ مصنوعی ذہانت (AI)، ڈرونز، سیٹلائٹس اور سوشل میڈیا کا استعمال کر کے اپنی کارروائیوں کو زیادہ پیچیدہ بنا رہی ہیں۔ اس لیے تمام ممالک کو چاہیے کہ وہ اس نئی ڈیجیٹل اور ٹیکنالوجیکل یلغار کا مقابلہ کرنے کے لیے اپنے سیکیورٹی ڈھانچے اور حکمت عملی کو جدید خطوط پر استوار کریں۔
امریکا کے مستقل مندوب مائیک والش نے اس موقع پر اظہارِ خیال کرتے ہوئے کہا کہ اگرچہ سلامتی کونسل میں اکثر امور پر شدید اختلافات پائے جاتے ہیں، لیکن دہشت گردی کی مذمت اور اس کے خلاف جنگ ایک ایسا نکتہ ہے جہاں پوری دنیا یک زبان اور متحد کھڑی ہے۔ انہوں نے یاد دلایا کہ 2001 کے ان حملوں کے بعد سے اب تک لاکھوں افراد براہِ راست یا بالواسطہ طور پر دہشت گردی کی بھینٹ چڑھ چکے ہیں۔ اجلاس کے دوران سلامتی کونسل کے صدر جیروم بونافونٹ نے اس بات پر بھی گہری تشویش ظاہر کی کہ شدت پسند عناصر ہماری ہی تکنیکی کامیابیوں کو ہمارے خلاف ہتھیار کے طور پر استعمال کر رہے ہیں۔
اس سے قبل سلامتی کونسل کے نمائندوں نے نیویارک میں واقع ورلڈ ٹریڈ سینٹر کی یادگار کا دورہ کیا اور وہاں سیاہ گرینائٹ پر درج متاثرین کے ناموں کے سامنے انہیں خراجِ عقیدت پیش کیا۔ دریں اثنا، اقوام متحدہ کے سیکریٹری جنرل انتونیو گوتریس نے اپنے پیغام میں نائن الیون کے واقعات کو انسانیت پر براہِ راست حملہ قرار دیتے ہوئے عالمی برادری پر زور دیا ہے کہ وہ دہشت گردی سے پاک اور پرامن مستقبل کی تعمیر کے لیے باہمی اختلافات کو بالائے طاق رکھ کر مشترکہ لائحہ عمل اپنائے۔
سلامتی کونسل کا سوشل میڈیا، اے آئی اور ڈرون کے دور میں دہشت گردی سے نمٹنے کے لیے سیکیورٹی نظام جدید بنانے پر زور
