تحریر : راجہ نورالہی عاطف
جہاں لفظ بے نقاب ہوں۔۔۔ وہیں سے سچ کا آغاز ہوتاہے
کسی بھی قوم کا روشن مستقبل اس کے باصلاحیت اور ہونہار بچوں سے وابستہ ہوتا ہے۔ جب کوئی طالب علم اپنی خداداد صلاحیت، مسلسل محنت اور اساتذہ کی بہترین تربیت کے ذریعے کامیابی کی بلندیوں کو چھوتا ہے تو یہ کامیابی صرف اس کے لیے نہیں بلکہ اس کے والدین، تعلیمی ادارے، اساتذہ اور پورے علاقے کے لیے باعثِ فخر بن جاتی ہے۔ گورنمنٹ ایلیمنٹری سکول ظفر آباد رنگپور بگھور کے ہونہار طالب علم محمد فضیل نے اپنی غیر معمولی صلاحیتوں کا مظاہرہ کرتے ہوئے حسنِ قرآت کے میدان میں جو شاندار کامیابی حاصل کی ہے، وہ یقیناً قابلِ تحسین اور قابلِ تقلید ہے۔
محمد فضیل نے مری میں منعقدہ آل پنجاب سکاوٹس کیمپ کے دوران ہونے والے مقابلۂ حسنِ قرآت میں صوبائی سطح پر پہلی پوزیشن حاصل کرکے اپنے ادارے، اساتذہ، والدین اور ضلع خوشاب کا نام روشن کر دیا۔ ایک سرکاری تعلیمی ادارے کے طالب علم کی صوبے بھر کے مقابلے میں پہلی پوزیشن حاصل کرنا اس بات کا واضح ثبوت ہے کہ اگر بچوں کو مناسب رہنمائی، حوصلہ افزائی اور مواقع فراہم کیے جائیں تو وہ کسی بھی سطح پر اپنی صلاحیتوں کا لوہا منوا سکتے ہیں۔
محمد فضیل کی یہ کامیابی اچانک حاصل ہونے والی کامیابی نہیں بلکہ اس کے پیچھے مسلسل محنت، والدین کی دعائیں اور اساتذہ کی شبانہ روز کاوشیں کارفرما ہیں۔ یہی وجہ ہے کہ اس کامیابی نے نہ صرف گورنمنٹ ایلیمنٹری سکول ظفر آباد رنگپور بگھور کی تعلیمی و ہم نصابی کارکردگی کو اجاگر کیا ہے بلکہ ضلع خوشاب کے تعلیمی میدان میں بھی ایک خوبصورت مثال قائم کی ہے۔
قابلِ ذکر امر یہ ہے کہ محمد فضیل نے اس سے قبل سرگودھا ڈویژن کے سرکاری سکولوں کے درمیان منعقدہ مقابلۂ حسنِ قرآت میں بھی ڈویژن سطح پر پہلی پوزیشن حاصل کی تھی۔ یوں اس باصلاحیت طالب علم نے ڈویژنل سطح سے صوبائی سطح تک اپنی کامیابیوں کا سفر جاری رکھتے ہوئے ثابت کیا ہے کہ محنت، عزم اور صلاحیت کے امتزاج سے کامیابی کا حصول یقینی بنایا جا سکتا ہے۔
قرآنِ کریم کی تلاوت محض ایک مقابلہ نہیں بلکہ ہمارے ایمان، تہذیب اور روحانی زندگی کا اہم حصہ ہے۔ بچوں میں حسنِ قرآت کا شوق پیدا کرنا اور انہیں قرآنِ پاک درست تلفظ، خوش الحانی اور عقیدت کے ساتھ پڑھنے کی ترغیب دینا ایک نہایت قابلِ قدر تعلیمی و تربیتی عمل ہے۔ اس حوالے سے محمد فضیل کی کامیابی دیگر طلبہ کے لیے بھی ایک مثبت مثال ہے کہ وہ اپنی نصابی سرگرمیوں کے ساتھ ساتھ دینی، ادبی اور ہم نصابی سرگرمیوں میں بھی بھرپور حصہ لیں۔
محمد فضیل نے اپنی کامیابی کے بارے میں نہایت عاجزی کا اظہار کرتے ہوئے کہا ہے کہ ان کی پے در پے کامیابیاں اللہ تعالیٰ کے خصوصی فضل و کرم، والدین کی دعاؤں اور اساتذہ کرام کی محنتِ شاقہ کا ثمر ہیں۔ ان کا یہ عزم بھی قابلِ ستائش ہے کہ وہ آئندہ بھی نصابی اور ہم نصابی سرگرمیوں میں مزید کامیابیاں حاصل کرکے اپنے ادارے اور علاقے کا نام روشن کریں گے۔
یقیناً ایسے ہونہار طلبہ کسی بھی تعلیمی ادارے کا قیمتی سرمایہ ہوتے ہیں۔ ضرورت اس امر کی ہے کہ محمد فضیل جیسے باصلاحیت بچوں کی بھرپور حوصلہ افزائی کی جائے، انہیں اپنی صلاحیتیں نکھارنے کے مزید مواقع فراہم کیے جائیں اور تعلیمی اداروں میں صحت مند ہم نصابی سرگرمیوں کو فروغ دیا جائے۔
محمد فضیل کی شاندار کامیابی پر عوامی، سماجی، تعلیمی، ادبی اور صحافتی حلقوں کی جانب سے گورنمنٹ ایلیمنٹری سکول ظفر آباد رنگپور بگھور کی انتظامیہ، اساتذہ، والدین اور محکمہ تعلیم ضلع خوشاب کے اربابِ بست و کشاد کو مبارکباد پیش کرنا بجا ہے۔ دعا ہے کہ اللہ تعالیٰ محمد فضیل کو مستقبل میں بھی اسی طرح کامیابیوں سے نوازے، اسے علم و عمل کی دولت عطا فرمائے اور وہ اپنی صلاحیتوں کے ذریعے اپنے والدین، اساتذہ، ادارے، علاقے اور وطنِ عزیز کا نام مزید روشن کرے۔
محمد فضیل کی کامیابی دراصل اس حقیقت کا روشن ثبوت ہے کہ باصلاحیت نوجوان، مخلص اساتذہ اور حوصلہ افزا تعلیمی ماحول مل کر کامیابی کی ایسی داستان رقم کر سکتے ہیں جس پر پوری قوم فخر کرے۔