لاہور:برطانوی ہائی کمیشن لاہور کے سربراہ بین وارنگٹن نے صوبائی وزیر اطلاعات عظمیٰ بخاری سے ملاقات کی ہے، جس میں سیکرٹری اطلاعات طاہر رضا ہمدانی بھی موجود تھے۔ ملاقات کے دوران دو طرفہ تعلقات اور ثقافتی امور پر تفصیلی تبادلہ خیال کیا گیا۔
برطانوی سفارتکار بین وارنگٹن نے وزیراعلیٰ پنجاب مریم نواز شریف کی جانب سے ثقافت کے فروغ کے لیے کیے جانے والے اقدامات کو سراہا۔ انہوں نے پنجاب میں محفوظ بسنت کے کامیاب انعقاد کو خوش آئند قرار دیتے ہوئے کہا کہ صوبے میں تھیٹر اور کلچر کی بحالی کے لیے انتہائی بہترین اقدامات کیے جا رہے ہیں، اور انہیں ذاتی طور پر پنجاب کا کلچر اور تھیٹر بہت پسند ہے۔ اس موقع پر عظمیٰ بخاری نے برطانوی سفارتکار کو آئندہ کلچر فیسٹیول میں شرکت کی خصوصی دعوت بھی دی۔
صوبائی وزیر اطلاعات نے گفتگو کرتے ہوئے واضح کیا کہ پنجاب میں تھیٹر کا احیاء وزیراعلیٰ مریم نواز کا مشن ہے، اور حکومت کی اولین ترجیح تھیٹر کی بحالی کے ساتھ ساتھ اس میں سے فحاشی کا مکمل خاتمہ کرنا ہے۔ انہوں نے بتایا کہ الحمراء آرٹس کونسل میں فیملی تھیٹر کی بحالی کے لیے کامیاب ڈرامے پیش کیے جا رہے ہیں جن میں فیملیز کی بڑی تعداد میں شرکت اس بات کا ثبوت ہے کہ عوام اس مثبت تبدیلی کو بھرپور پذیرائی بخش رہے ہیں۔ ملاقات کے اختتام پر برطانوی سفارتکار بین وارنگٹن نے صوبائی وزیر عظمیٰ بخاری کو روایتی سوینیر (تحفہ) بھی پیش کیا۔