راولپنڈی :بلوچستان کے ضلع پنجگور میں سیکیورٹی فورسز نے انٹیلی جنس بیسڈ آپریشن کے دوران فتنۃ الہندوستان سے تعلق رکھنے والے 5 دہشت گردوں کو ہلاک کردیا ہے۔
پاک فوج کے شعبہ تعلقات عامہ (آئی ایس پی آر) کی جانب سے جاری بیان کے مطابق سیکیورٹی فورسز کے بلوچستان میں ’فتنہ الہندوستان‘ سے تعلق رکھنے والے دہشت گردوں کے خلاف انیٹلی جنس بیسڈ آپریشنز جاری ہیں۔
آئی ایس پی آر کے مطابق 10 اگست 2026 کو سیکیورٹی فورسز نے بلوچستان کے ضلع پنجگور میں دہشت گردوں کی موجودگی کی خفیہ اطلاع پر آپریشن کرتے ہوئے فتنہ الہندوستان سے تعلق رکھنے والے دہشت گردوں کے ٹھکانے کا سے صفایا کردیا اور اس آپریشن کے دوران 5 دہشت گرد مارے گئے۔
آئی ایس پی آر کے مطابق یہ آپریشن سیکیورٹی فورسز نے بھارتی حمایت یافتہ آلہ کاروں کے خاتمے اور خطے میں دیرپا امن کی بحالی کے لیے جاری انسدادِ دہشت گردی کی مہم کے سلسلے میں کیا جب کہ آپریشن کے دوران سیکیورٹی فورسز نے ہلاک دہشت گردوں کے قبضے سے بڑی مقدار میں اسلحہ، گولہ بارود اور دیسی ساختہ بم برآمد کیے، جنہیں موقع پر ہی تباہ کردیا گیا۔ترجمان پاک فوج نے نے بتایا کہ آپریشن کے فوراً بعد علاقے میں کلیئرنس اورسینیٹائزیشن آپریشن بھی کیا گیا تاکہ باقی ماندہ خطرات کا خاتمہ یقینی بنایا جاسکے۔
ترجمان نے مزید کہا کہ ملک سے غیر ملکی سرپرستی اور حمایت یافتہ دہشت گردی کی لعنت کو جڑ سے اکھاڑ پھینکنے کے لیے سیکیورٹی فورسز اور قانون نافذ کرنے والے اداروں کی جانب سے ”عزمِ استحکام“ وژن کے تحت انسدادِ دہشت گردی کی یہ بھرپور مہم پوری رفتار سے جاری رہے گی۔
صدر، وزیراعظم اور وزیر داخلہ کا خراج تحسین
دوسری جانب صدرِ مملکت آصف علی زرداری نے پنجگور میں کامیاب آپریشن پر سیکیورٹی فورسز کو خراجِ تحسین پیش کیا ہے۔
صدر کا کہنا ہے کہ کارروائیاں دہشت گردی کے خاتمے تک جاری رہیں گی، دہشت گردی کے خلاف سیکیورٹی فورسز کا عزم قابلِ تحسین ہے جب کہ دہشت گردوں کے مذموم عزائم ہر قیمت پر ناکام بنائے جائیں گے۔
وزیراعظم شہباز شریف نے پنجگور میں دہشت گردوں کے خلاف آپریشن پر سیکیورٹی فورسز کو خراج تحسین پیش کیا اور آپریشن کے دوران 5 دہشت گردوں کو ہلاک کرنے پر سیکیورٹی فورسز کی ستائش کی ہے۔
وزیراعظم نے کہا کہ سیکیورٹی فورسز شاندار کامیابیاں حاصل کر رہی ہیں، دہشت گردی کے مکمل خاتمے کے لیے پر عزم ہیں۔
وفاقی وزیر داخلہ محسن نقوی نے بھی پنجگور میں آپریشن پر سیکیورٹی فورسز کو خراج تحسین پیش کرتے ہوئے ان کی پیشہ وارانہ صلاحیتوں کو سراہا ہے۔ انہوں نے کہا کہ سیکیورٹی فورسز نے دہشت گردوں کے عزائم کو ناکام بنایا۔
پنجگور میں سیکیورٹی فورسز کا انٹیلی جنس بیسڈ آپریشن، فتنہ الہندوستان کے5 دہشت گرد مارے گئے
