اپاچی ہیلی کاپٹر کا انتقام، امریکا کے ایران پر حملے ، ایران کی بھرپور جوابی کارروائی

    تہران/واشنگٹن (نیوز ڈیسک)
    امریکا کا آبنائے ہرمز کے اوپر اپنے گرائے گئے اپاچی ہیلی کاپٹر کا انتقام لینے کے لئے ایران پر 20 حملے کئے ہیں جبکہ امریکی حملوں کے جواب میں ایرانی انقلابی گارڈز (IRGC) نے جوابی کارروائی کرتے ہوئے اردن، کویت اور بحرین میں موجود امریکی فوجی تنصیبات کو میزائلوں اور ڈرونز سے نشانہ بنا دیا ہے۔ یہ حالیہ مہینوں میں دونوں ممالک کے درمیان براہِ راست تصادم کا سب سے خطرناک مرحلہ ہے۔


    ایرانی انقلابی گارڈز نے دعویٰ کیا ہے کہ انہوں نے اردن کے ‘الازرق’ ایئربیس پر طویل فاصلے تک مار کرنے والے میزائلوں سے حملہ کیا۔ آئی آر جی سی کے مطابق، حملے میں ایف-35 لڑاکا طیاروں کے ہینگرز اور اہم کمانڈ اینڈ کنٹرول سینٹر کو کامیابی سے تباہ کیا گیا ہے۔ اسی دوران، بحرین میں موجود امریکی پانچویں بحری بیڑے پر بھی ڈرون حملہ کیا گیا۔ ایران کا دعویٰ ہے کہ انہوں نے پورے خطے میں کل 21 امریکی اہداف کو نشانہ بنایا ہے، جبکہ ایرانی فضائی حدود کی خلاف ورزی کرنے والا ایک امریکی MQ-9 ڈرون بھی مار گرایا گیا ہے۔


    امریکی سینٹرل کمانڈ (CENTCOM) نے تصدیق کی ہے کہ صدر ڈونلڈ ٹرمپ کی ہدایت پر ایران کے فضائی دفاعی نظام، ریڈار سائٹس اور گراؤنڈ کنٹرول اسٹیشنز پر حملے کیے گئے۔ امریکی صدر نے سخت الفاظ میں انتباہ دیتے ہوئے کہا ہے کہ ایران کے ان اقدامات کا انتہائی طاقتور جواب دیا جائے گا۔

    اردن: اردنی فوج کے مطابق 5 میزائل فضا میں ہی تباہ کر دیے گئے، تاہم ملبہ گرنے سے کسی جانی نقصان کی اطلاع نہیں ہے۔

    امریکی سینٹ کام: امریکی حکام کا کہنا ہے کہ زیادہ تر میزائلوں اور ڈرونز کو فضا میں ہی ناکارہ بنا دیا گیا، جس سے امریکی تنصیبات کو کسی بڑے نقصان کی فوری اطلاع نہیں ہے۔

    ایران: ایران کے مطابق امریکی حملوں میں ان کے فضائی دفاعی یونٹ کے دو اہلکار ہلاک ہوئے، جبکہ کچھ انفراسٹرکچر بشمول ٹیلی کمیونیکیشن ٹاورز کو نقصان پہنچا۔

    ۔یہ تنازع اس وقت شروع ہوا تھا جب امریکہ نے الزام عائد کیا کہ ایران نے ایک اپاچی ہیلی کاپٹر مار گرایا ہے۔ تاہم یہ واضح نہیں کہ امریکی AH-64 اپاچی ہیلی کاپٹر کی تباہی حادثاتی تھی یا ایک دانستہ کارروائی ۔امریکی صدر ڈونلڈ ٹرمپ نے سوشل میڈیا پر لکھا کہ ’دونوں پائلٹ محفوظ ہیں اور زخمی نہیں ہوئے۔ لیکن امریکہ اس حملے کا جواب ضرورت کے تحت دے گا۔ٹرمپ نے اے بی سی نیوز سے بات کرتے ہوئے امریکی حملوں کی ذمہ داری ایران پر عائد کرتے ہوئے کہا کہ ’انھوں نے جو کیا، یہ اس کا جواب ہے، انھوں نے جو ہمارے ہیلی کاپٹر کے ساتھ کیا اور میرا ماننا ہے کہ جواب مضبوط اور طاقتور ہونا چاہیے اور یہ ایسا ہی ہے۔امریکی ایوان نمائندگان کے سپیکر مائیک جانسن کے مطابق وہ اس وقت صدر ٹرمپ کے ساتھ ہی تھے جب ایران پر حملے کرنے کا فیصلہ لیا گیا۔ انھوں نے کہا کہ ’ایسا کرنا ضروری تھا۔‘


    ایرانی وزیر خارجہ عباس عراقچی نے سوشل میڈیا پر سخت انتباہ جاری کرتے ہوئے کہا ہے کہ: "اگر آپ محفوظ رہنا چاہتے ہیں تو ہمارا علاقہ چھوڑ دیں۔” دوسری جانب واشنگٹن نے واضح کر دیا ہے کہ کسی بھی جارحیت کا "کچلنے والا اور فیصلہ کن” جواب دیا جائے گا۔ اپریل میں ہونے والی جنگ بندی مکمل طور پر ختم ہو چکی ہے اور خطہ ایک بڑی جنگ کے دہانے پر کھڑا ہے

    Related Posts