قاضی احمد رپورٹ سائين بخش لاکھو
قاضی احمد شہر کے دیڑاں روڈ پر قائم پاکستان پوسٹ آفس گزشتہ ایک ہفتے سے بند ہونے کے باعث شہریوں کو شدید مشکلات کا سامنا ہے۔ذرائع کے مطابق جنرل پوسٹ آفس کے حکام گزشتہ 18 ماہ کا ایک لاکھ 22 ہزار روپے کرایہ دکان کے مالک وزیر بالادی کو ادا کرنے میں ناکام رہے، جس کے نتیجے میں دکان کے مالک نے پوسٹ آفس کو تالا لگا کر بند کر دیا۔پوسٹ آفس کی مسلسل ایک ہفتے سے بندش کے باعث سوئی گیس، بجلی اور دیگر یوٹیلٹی بلوں کی ادائیگی کے لیے آنے والے سینکڑوں شہری روزانہ مایوس ہو کر واپس لوٹ رہے ہیں۔ اس کے علاوہ مالیاتی خدمات، رقم کی ترسیل اور دیگر ڈاکی سہولیات بھی مکمل طور پر متاثر ہو چکی ہیں۔دوسری جانب پوسٹ آفس کا عملہ دفتر سے باہر سڑک کنارے بیٹھنے پر مجبور ہے، جس کے باعث ادارے کی روزمرہ کارکردگی بری طرح متاثر ہو رہی ہے۔شہریوں نے متعلقہ حکام سے مطالبہ کیا ہے کہ کرایہ کی ادائیگی کے مسئلے کو فوری طور پر حل کر کے پوسٹ آفس دوبارہ کھولا جائے تاکہ عوام کو درپیش مشکلات کا خاتمہ ہو سکے اور ڈاکی و مالیاتی خدمات بحال کی جا سکیں۔