میکلوڈ گنج (راشد ڈھڈی) منچن آباد کے نواحی علاقے میکلوڈ گنج، کالوکا بائی پاس پر واقع پیور شور واٹر پلانٹ میں گزشتہ رات چوروں نے چوری کی بڑی واردات کرتے ہوئے لاکھوں روپے مالیت کا سامان چوری کر لیا۔
ذرائع کے مطابق چور رات کی تاریکی کا فائدہ اٹھاتے ہوئے واٹر پلانٹ میں داخل ہوئے اور واٹر سپلائی کے لیے استعمال ہونے والا لوڈر رکشہ سمیت دیگر قیمتی آلات اور سامان لے کر فرار ہو گئے۔ واردات کے باعث پلانٹ کو بھاری مالی نقصان پہنچا ہے جبکہ علاقے میں صاف پانی کی فراہمی بھی متاثر ہونے کا خدشہ ظاہر کیا جا رہا ہے۔واٹر پلانٹ کے مالک عمران نواز بھٹی نے واقعہ پر شدید تشویش کا اظہار کرتے ہوئے کہا کہ چوری کی اس واردات سے نہ صرف مالی نقصان ہوا بلکہ عوامی خدمت کے اس منصوبے کو بھی نقصان پہنچا ہے۔ انہوں نے پولیس حکام سے مطالبہ کیا کہ ملزمان کو جلد از جلد گرفتار کرکے چوری شدہ سامان برآمد کیا جائے۔واقعے کی اطلاع ملتے ہی مقامی پولیس موقع پر پہنچ گئی، شواہد اکٹھے کیے گئے اور نامعلوم ملزمان کے خلاف قانونی کارروائی شروع کر دی گئی۔