ذوالفقار علی بھٹو رابطہ کمیٹی کا نواب شاہ میں ایچ آئی وی آگاہی کیمپ، شدید گرمی میں ٹھنڈے پانی کی سبیل بھی قائم

نواب شاہ (رپورٹ: نفیس آرائیں) ذوالفقار علی بھٹو رابطہ کمیٹی نواب شاہ کی جانب سے جونیئر ذوالفقار بھٹو کی ہدایات پر ریگل چوک میں ایچ آئی وی سے بچاؤ اور عوامی شعور اجاگر کرنے کے لیے خصوصی آگاہی کیمپ منعقد کیا گیا، جہاں شہریوں کو بیماری سے متعلق معلومات، احتیاطی تدابیر اور مفت طبی مشورے فراہم کیے گئے۔کیمپ میں پروفیسر ڈاکٹر عبدالقیوم میمن نے خصوصی شرکت کی، جبکہ رابطہ کمیٹی کے رہنماؤں الطاف حسین بھٹی، علی شیر بھارونجو، نظر کیریو، ایاز بروہی، علی میرانی، سلمان کیریو و دیگر نے میڈیا سے گفتگو کرتے ہوئے کہا کہ ایچ آئی وی جیسے موذی مرض سے بچاؤ کے لیے بروقت ٹیسٹ اور عوامی آگاہی ناگزیر ہے۔ انہوں نے کہا کہ بیماری کی ابتدائی تشخیص سے مؤثر علاج ممکن بنایا جاسکتا ہے، لہٰذا عوام بالخصوص نوجوان اپنی صحت کے حوالے سے سنجیدگی کا مظاہرہ کریں اور کسی بھی خدشے کی صورت میں فوری طور پر ماہر معالجین سے رجوع کریں۔