ناکہ بندی برقرار رہی تو آبنائے ہرمز پھر بند : ایران بدھ تک معاہدہ نہ ہوا تو جنگ: امریکا

تہران +واشنگٹن ڈی سی :ایران نے اشارہ دیا ہے کہ اگر امریکی ناکہ بندی برقرار رہی تو وہ آبنائے ہرمز کو دوبارہ بند کر سکتا ہے جبکہ امریکی صدر ڈونلڈٹرمپ نے خبردار کیا ہے کہ ناکہ بندی برقراررہے گی اور اگر بدھ تک معاہدہ نہ ہوا تو جنگ پھر شروع ہوسکتی ہے۔
خبر رساں اداروں کے مطابق ایران کے پارلیمانی سپیکر محمد باقر قالیباف نے سنیچر کو ایک بیان میں کہا کہ ایرانی بندرگاہوں پر امریکی پابندیاں جاری رہیں تو صورت حال جوابی اقدام کی طرف جائے گی۔
انہوں نے ایکس پر لکھا کہ ’ناکہ بندی کا تسلسل رہا تو آبنائے ہرمز کھلی نہیں رہے گی۔‘محمد باقر قالیباف نے ایکس پر چند نکات کی شکل میں پوسٹ میں لکھا کہ ’امریکہ کے صدر نے ایک گھنٹے میں سات دعوے کیے اور وہ تمام جھوٹے تھے۔ ایسے جھوٹ کے سہارے وہ جنگ نہیں جیت سکے اور یقیناً مذاکرات سے بھی ان کو کچھ حاصل نہیں ہو گا۔ ناکہ بندی کے تسلسل کے ساتھ آبنائے ہرمز کھلی نہیں رہے گی۔‘
امریکی صدر ڈونلڈ ٹرمپ نے کہا ہے کہ اگر بدھ تک جنگ کے خاتمے کے لیے طویل مدتی معاہدہ طے نہ پایا تو وہ ایران کے ساتھ موجودہ جنگ بندی کو ختم کر سکتے ہیں۔
خبر رساں ادارے اے ایف پی کے مطابق جمعے کو ایریزونا کے شہر فینکس سے واشنگٹن واپسی پر ’ایئر فورس ون‘ میں صحافیوں سے گفتگو کرتے ہوئے صدر ڈونلڈ ٹرمپ نے کہا ’ہو سکتا ہے کہ میں اسے (جنگ بندی کو) نہ بڑھاؤں لیکن (ایرانی بندرگاہوں پر) ناکہ بندی برقرار رہے گی۔‘
انہوں نے مزید کہا ’لہٰذا ناکہ بندی موجود رہے گی اور بدقسمتی سے ہمیں دوبارہ بمباری شروع کرنا پڑے گی۔‘