ٹرمپ کے خطاب کے بعد تیل کی قیمتوں میں اضافہ، سٹاک مارکیٹس میں مندی

لندن+واشنگٹن :ٹرمپ کے ریمارکس کے بعد تیل کی قیمتوں میں تیزی سے اضافہ ہوا۔ بین الاقوامی معیار کے برینٹ کروڈ کی قیمت 5 فیصد اضافے کے ساتھ 106.22 ڈالر فی بیرل ہو گئی۔ بینچ مارک یو ایس کروڈ 4.2 فیصد بڑھ کر 104.36 ڈالر فی بیرل ہو گیا۔
صدر کے خطاب سے پہلے بینچ مارک برینٹ کروڈ کی قیمت تقریباً 100 ڈالر فی بیرل تھی۔
خطاب کے دوران اس میں اتار چڑھاؤ آیا، لیکن اب یہ اوپر جا رہی ہے اور اس وقت تقریباً چار فیصد اضافے کے ساتھ 105 اعشاریہ 38 ڈالر تک پہنچ چکی ہے۔
عالمی تیل کی منڈیاں اوپر جا رہی ہیں تو امریکی سٹاک فیوچرز گر رہے ہیں، جو جمعرات کی صبح وال سٹریٹ کے کم سطح پر کھلنے کی نشاندہی کرتا ہے۔
ڈاؤ جونز اور ایس اینڈ پی 500 کے فیوچرز تقریباً صفر اعشاریہ سات فیصد نیچے ہیں، جبکہ نیسڈیک کے فیوچرز تقریباً ایک فیصد تک گر چکے ہیں۔
سٹاک مارکیٹ فیوچرز ایسے معاہدے ہوتے ہیں جو سرمایہ کاروں کو مستقبل کی کسی مقررہ تاریخ پر ایک طے شدہ قیمت پر سٹاک انڈیکس خریدنے یا فروخت کرنے کی اجازت دیتے ہیں۔