اسلام آباد: بیرونِ ملک ملازمت دلوانے اور شوبز سے وابستہ افراد کو سٹیج پروگراموں کے لیے باہر لے جانے کے نام پر شہریوں کو لوٹنے والا ایک مبینہ نیٹ ورک سامنے آگیا۔ وفاقی تحقیقاتی ادارے (ایف آئی اے) اینٹی ہیومن ٹریفکنگ سرکل اسلام آباد نے کارروائی کرتے ہوئے ایک ملزم کو لاہور سے گرفتار کر لیا۔
ذرائع کے مطابق ملزمان شہریوں کو سعودی عرب سمیت مختلف ممالک میں ملازمت اور شوبز پروگراموں کے مواقع فراہم کرنے کا لالچ دیتے تھے۔ متاثرین سے ویزہ، ٹکٹ اور دیگر اخراجات کے نام پر لاکھوں روپے وصول کیے جاتے، مگر بعد میں نہ ویزا ملتا اور نہ ہی ملازمت۔
ایف آئی اے میں درج مقدمے کے مطابق اس نیٹ ورک کے ذریعے بڑی تعداد میں شہریوں سے رقوم وصول کی گئیں اور مجموعی طور پر کروڑوں روپے بٹورے گئے۔ کارروائی انسپکٹر محمد عبداللہ کیانی کی سربراہی میں کی گئی، جس کے دوران ایک مرکزی ملزم کو لاہور سے گرفتار کیا گیا۔
ذرائع کا کہنا ہے کہ ملزم کی گرفتاری کے لیے ٹیم کو دو مرتبہ چھاپہ مارنا پڑا کیونکہ پہلے چھاپے کے دوران مزاحمت کا سامنا کرنا پڑا۔ دوسرے چھاپے کے دوران ملزم کو حراست میں لے لیا گیا اور مزید تفتیش شروع کر دی گئی۔
اطلاعات کے مطابق ملزم کا تعلق ایک معروف سٹیج اداکارہ دیدار کے خاندان سے بتایا جا رہا ہے، تاہم اداکارہ دیدار اس مقدمے میں ملزمہ نہیں ہیں اور نہ ہی ان کے خلاف کوئی مقدمہ درج کیا گیا ہے۔
ایف آئی اے حکام کا کہنا ہے کہ تحقیقات کا دائرہ وسیع کر دیا گیا ہے اور اس مبینہ فراڈ نیٹ ورک سے وابستہ دیگر افراد کی تلاش جاری ہے۔ حکام نے عوام کو خبردار کیا ہے کہ بیرونِ ملک ملازمت یا شوبز پروگراموں کے نام پر رقم دینے سے پہلے متعلقہ اداروں سے مکمل تصدیق ضرور کریں تاکہ کسی بھی ممکنہ دھوکہ دہی سے بچا جا سک