لاہور: تھانہ مصطفیٰ آباد میں اے ایس آئی محمد افتخار کی جانب سے شہری سے رشوت وصول کرنے کی ویڈیو سوشل میڈیا پر وائرل ہونے کے بعد محکمہ پولیس میں ہنگامہ برپا ہو گیا ہے۔ وائرل ویڈیو کا سخت نوٹس لیتے ہوئے ڈی آئی جی انویسٹی گیشن سید ذیشان رضا نے فوری طور پر اے ایس آئی محمد افتخار کو معطل کر کے انویسٹی گیشن ہیڈکوارٹر رپورٹ کرنے کے احکامات جاری کر دیے ہیں۔
ڈی آئی جی انویسٹی گیشن نے معاملے کی شفاف اور بر وقت تحقیقات کے لیے ایس پی انویسٹی گیشن کینٹ عاصم افتخار کمبوہ کو انکوائری افسر مقرر کرتے ہوئے 2 دن کے اندر مکمل انکوائری رپورٹ پیش کرنے کی سخت ہدایت کی ہے۔ ڈی آئی جی ذیشان رضا کا اس موقع پر واضح کہنا تھا کہ محکمہ پولیس میں رشوت خوری اور بدعنوانی میں ملوث عناصر کسی بھی قسم کی رعایت کے مستحق نہیں ہیں اور شہریوں کو بلیک میل کرنے والوں کے خلاف سخت ترین قانونی و ڈسپلنری کارروائی کی جائے گی۔