اسلام آباد :پاکستان ٹیلی کمیونیکیشن اتھارٹی (پی ٹی اے) نے وائی فائی 7 اور آئندہ آنے والی تمام وائی فائی جنریشنز کے لیے 6 گیگا ہرٹز بینڈ (5925–6425 MHz) میں استعمال کی منظوری دے دی ہے، جو وائی فائی 6E کے پہلے سے منظور شدہ معیار کے عین مطابق ہے۔
اس تاریخی پیش رفت کے نتیجے میں پاکستان ایشیا پیسیفک کے ان اولین ممالک میں شامل ہو گیا ہے جو اس جدید ٹیکنالوجی کو اپنا رہے ہیں، جبکہ یہ پیش رفت ملک کے ڈیجیٹل ارتقاء، جدت اور عالمی سطح پر قیادت کے عزم کے حوالے سے اہم پیش رفت ہے۔جمعہ کو پی ٹی اے سے جاری بیان کے مطابق وائی فائی 7 شاندار طور پر تیز ترین ڈیٹا ریٹس نہایت کم لیٹنسی اور بے مثال قابلِ اعتماد کارکردگی فراہم کرتا ہے، جو 8 کے اسٹریمنگ، AR/VR کے جدید تجربات اور صنعتی آٹومیشن کے لیے بہترین اور جامع حل پیش کرتا ہے۔
یہ جدید ٹیکنالوجی پرانےفریکوئنسی بینڈز کے زیادہ استعمال اور براڈبینڈ کی فراہمی کے اخراجات میں کمی کے ذریعے، گھروں، چھوٹے و درمیانے کاروباروں، تعلیمی اداروں، صحت عامہ کے مراکز اور اسمارٹ سٹی منصوبوں کے لیے تیز تر، پائیدار اور قابلِ اعتماد کنیکٹیویٹی کو یقینی بناتی ہے۔یہ سنگِ میل پی ٹی اے کے غیر متزلزل عزم کی عکاسی کرتا ہے کہ وہ پاکستان میں ڈیجیٹل خلا کو ختم کرے، ٹیلی کمیونی کیشن انفراسٹرکچر کو نئی مضبوطی اور استحکام دے اور ملک کو ایک محفوظ، جدید اور ہمہ گیر ڈیجیٹل معیشت کی جانب تیز تر پیش رفت کے ساتھ آگے بڑھائے۔