لاہور:پاکستان کرکٹ بورڈ (پی سی بی) نے 26-2025 سیزن کے لیے اپنے سینٹرل کنٹریکٹس کا اعلان کر دیا ہے، جس میں 12 نئے کھلاڑیوں کو پہلی بار شامل کیا گیا ہے۔
رپورٹ کے مطابق اس سال 30 کھلاڑیوں کو کنٹریکٹ دیے گئے ہیں، جبکہ پچھلے سال یہ تعداد 27 تھی۔ یہ معاہدے یکم جولائی 2025 سے 30 جون 2026 تک نافذ العمل رہیں گے۔
اہم تبدیلیاں اور نئی شمولیت
اس سال کی فہرست میں سب سے اہم بات یہ ہے کہ کسی بھی کھلاڑی کو ‘اے’ کیٹیگری میں شامل نہیں کیا گیا، جس کی وجہ ان کی کارکردگی کا معیار ہے۔ سابق کپتان بابر اعظم اور محمد رضوان، جو گزشتہ سال ‘اے’ کیٹیگری میں تھے، اب ‘بی’ کیٹیگری میں شامل ہو گئے ہیں۔
بورڈ نے ان کنٹریکٹس کو کھلاڑیوں کی کارکردگی کی بنیاد پر تقسیم کیا ہے اور اس سال ہر کیٹیگری میں 10، 10 کھلاڑیوں کو رکھا گیا ہے۔
نئے شامل ہونے والے 12کھلاڑی:
نئے سینٹرل کنٹریکٹ میں شامل ہونے والے 12 کھلاڑیوں میں احمد دانیال، فہیم اشرف، حسن علی، حسن نواز، حسین طلعت، خوشدل شاہ، محمد عباس، محمد حارث، محمد نواز، صاحبزادہ فرحان، سلمان مرزا اور صفیان مقیم شامل ہیں۔
کیٹیگریز کی تفصیل:
کیٹیگری بی: بابر اعظم، محمد رضوان، شاہین شاہ آفریدی، فخر زمان، شاداب خان، ابرار احمد، حارث رؤف، حسن علی، صائم ایوب، اور سلمان علی آغا۔
کیٹیگری سی: عبداللہ شفیق، نسیم شاہ، سعود شکیل، فہیم اشرف، ساجد خان، محمد نواز، محمد حارث، صاحبزادہ فرحان، حسن نواز، اور نعمان علی۔
کیٹیگری ڈی: شان مسعود، حسین طلعت، محمد عباس، محمد وسیم جونیئر، محمد عباس آفریدی، خوشدل شاہ، احمد دانیال، سلمان مرزا، خرم شہزاد، اور صفیان مقیم۔
اس فیصلے کے بعد 9 کھلاڑی اپنی سابقہ کیٹیگری برقرار رکھنے میں کامیاب رہے جبکہ 8 کھلاڑی سینٹرل کنٹریکٹ سے باہر ہو گئے ہیں۔