ویب ڈیسک (بے نقاب نیوز): عالمی عدالتِ انصاف (ICJ) کی جانب سے روہنگیا مسلمانوں کے خلاف میانمار کے فوجی کریک ڈاؤن کو نسل کشی قرار دیے جانے کے بعد روہنگیا متاثرین اور انسانی حقوق کی تنظیموں نے اس فیصلے کا خیرمقدم کرتے ہوئے اسے انصاف کی جانب ایک تاریخی قدم اور اپنی اخلاقی فتح قرار دیا ہے۔
بین الاقوامی خبر رساں اداروں کے مطابق عالمی عدالت کے ججز نے اپنے فیصلے میں قرار دیا کہ میانمار کی سکیورٹی فورسز نے روہنگیا آبادی کے خلاف منظم اور وحشیانہ کارروائیاں کیں، جن کا مقصد اس اقلیتی برادری کا وجود ختم کرنا تھا۔ عدالتی فیصلے میں اس امر کی بھی توثیق کی گئی کہ میانمار نے نسل کشی کی روک تھام کے عالمی کنونشن کی خلاف ورزی کی ہے۔
فیصلے کے بعد بنگلہ دیش کے مہاجر کیمپوں میں مقیم لاکھوں روہنگیا پناہ گزینوں اور دنیا بھر میں موجود روہنگیا رہنماؤں نے اطمینان کا اظہار کیا ہے۔ متاثرین کا کہنا ہے کہ برسوں کی بے گھری، مظالم اور اپنوں کے کھو جانے کے بعد عالمی سطح پر اس حقیقت کا اعتراف ان کے زخموں پر مرہم رکھنے کے مترادف ہے۔
روہنگیا نمائندوں نے عالمی برادری سے مطالبہ کیا ہے کہ عدالتی فیصلے کی روشنی میں میانمار کی فوجی قیادت کا احتساب یقینی بنایا جائے اور روہنگیا مسلمانوں کی باعزت اور محفوظ وطن واپسی کے لیے عملی اقدامات کیے جائیں۔

