سلہٹ:
بنگلہ دیش اور ویسٹ انڈیز کے درمیان دو ٹیسٹ میچوں کی سیریز کے دوسرے اور آخری ٹیسٹ میچ میں ویسٹ انڈیز نے اپنی پہلی اننگز میں شاندار بیٹنگ کا مظاہرہ کرتے ہوئے 356 رنز بنا لیے ہیں۔ سلہٹ انٹرنیشنل کرکٹ اسٹیڈیم میں کھیلے جا رہے اس میچ کے دوسرے دن کے اختتام تک بنگلہ دیش نے اپنی پہلی اننگز میں 3 وکٹوں کے نقصان پر 88 رنز بنا لیے ہیں۔میچ کے پہلے روز ویسٹ انڈیز کے کپتان روسٹن چیس نے ٹاس جیت کر پہلے خود بیٹنگ کرنے کا فیصلہ کیا۔ مہمان ٹیم نے طویل اور ذمہ دارانہ بیٹنگ کرتے ہوئے 106.4 اوورز میں 356 رنز کا مجموعہ اسکور بورڈ پر سجایا۔ویسٹ انڈیز کی جانب سے عامر جنگو نے شاندار اور ذمہ دارانہ بیٹنگ کا مظاہرہ کرتے ہوئے 133 رنز کی لاجواب اننگز کھیلی، جس میں 13 شاندار چوکے اور 2 چھکے شامل تھے۔اس کے علاوہ جسٹن گریوز نے 51 رنز کی نصف سنچری اسکور کی، جبکہ ڈیبیو کرنے والے کیون ویکہم نے بھی 61 رنز کی اہم اننگز کھیل کر ٹیم کے اسکور کو مستحکم کیا۔بنگلہ دیش کی جانب سے بولنگ میں حسن محمود نے تباہ کن بولنگ کرتے ہوئے 6 کھلاڑیوں کو پویلین کی راہ دکھائی، جبکہ تجربہ کار تسکین احمد اور مہدی حسن نے 2، 2 وکٹیں حاصل کیں۔ویسٹ انڈیز کے پہاڑ جیسے اسکور کے جواب میں بنگلہ دیش نے اپنی پہلی اننگز کا آغاز کیا تو دوسرے دن کے کھیل کے اختتام تک ٹیم نے 40 اوورز میں 3 وکٹوں کے نقصان پر 88 رنز بنا لیے ہیں۔ میزبان ٹیم کو ویسٹ انڈیز کا اسکور برابر کرنے کے لیے ابھی مزید 268 رنز درکار ہیں جبکہ اس کی 7 وکٹیں باقی ہیں۔ دن کے کھیل کے اختتام پر توحید ہردوئے اور تجربہ کار بلے باز مشفقر الرحیم کریز پر موجود ہیں۔میچ کی موجودہ صورتحال کو دیکھتے ہوئے ویسٹ انڈیز کی پوزیشن کافی مضبوط نظر آرہی ہے اور وہ سیریز میں 0-1 کی برتری کو برقرار رکھتے ہوئے کلین سوئپ کرنے کی پوزیشن میں دکھائی دے رہی ہے۔