عمرکوٹ (رپورٹ: بیورو چیف ڈاکٹر ایم لال واگھانی)
انٹرنیشنل ہیومن رائٹس موومنٹ پاکستان، سندھ کی تنظیمی سرگرمیوں کو مزید فعال اور مؤثر بنانے کے لیے اہم اجلاس منعقد کرنے کا فیصلہ کیا گیا ہے۔
سیکریٹری جنرل صوبہ سندھ مینارٹی ونگ ڈاکٹر ایم لال واگھانی کا کہنا ہے کہ سندھ بھر میں انسانی حقوق، بالخصوص اقلیتی برادری کے مسائل کے حل اور ان کے حقوق کے لیے آواز کو مزید مؤثر بنایا جائے گا۔
تفصیلات کے مطابق انٹرنیشنل ہیومن رائٹس موومنٹ پاکستان سندھ کے تنظیمی امور کے حوالے سے اہم اجلاس جلد کراچی، حیدرآباد اور عمرکوٹ میں منعقد کیے جائیں گے۔ اجلاس میں تنظیم کے مرکزی چیئرمین رانا بشارت علی خان، صدر سندھ مینارٹی ونگ آفاق یوسف، نائب صدر گوتم شرما، ڈونگرو مل، بیربل، اور تقی صاحب سمیت سندھ کے دیگر اہم عہدیداران کی شرکت متوقع ہے۔
ان اجلاسوں میں تنظیمی ڈھانچے کو مزید مضبوط بنانے، انسانی حقوق کے تحفظ، اقلیتی برادری کے مسائل، عوامی رابطہ مہم، نوجوانوں کی شمولیت اور سندھ کے مختلف علاقوں میں تنظیمی سرگرمیوں کے فروغ پر تفصیلی مشاورت کی جائے گی۔
سیکریٹری جنرل صوبہ سندھ مینارٹی ونگ ڈاکٹر ایم لال واگھانی نے بتایا کہ انٹرنیشنل ہیومن رائٹس موومنٹ کا بنیادی مقصد انسانی وقار، مساوات، قانون کی پاسداری، انسانی حقوق کے شعور اور پرامن سماجی جدوجہد کو فروغ دینا ہے۔
انہوں نے کہا کہ سندھ کے مختلف اضلاع میں دورے اور عوامی رابطہ مہم کے ذریعے انسانی حقوق سے متعلق مسائل کو اجاگر کیا جائے گا، جبکہ اقلیتی برادری کے بنیادی حقوق کے تحفظ کے لیے بھی مؤثر آواز بلند کی جائے گی۔
ڈاکٹر ایم لال واگھانی نے تنظیم کے مرکزی چیئرمین رانا بشارت علی خان کے عزم کو دہراتے ہوئے کہا کہ انسانی حقوق کے تحفظ اور مظلوم طبقات کی بلا تفریق داد رسی کے لیے تنظیم ہر سطح پر تمام تر صلاحیتیں بکار لائے گی اور پرامن جدوجہد کا دائرہ کار پورے صوبے میں وسیع کیا جائے گا۔