سیالکوٹ۔سلیم احمد اعوان شیخو
صوبائی وزیر بلدیات پنجاب میاں ذیشان رفیق نے کہا ہے کہ ستھرا پنجاب کے نظام کو مزید مؤثر بنانے کے لئے بیٹ سسٹم متعارف کرایا گیا ہے۔ضلع سیالکوٹ کو بھی مختلف بیٹس میں تقسیم کر دیا گیا ہے جبکہ نظام پر مؤثر عملدرآمد یقینی بنانے کے لیے جیو ٹیگنگ اور اے آئی مانیٹرنگ کے ذریعے سخت نگرانی کی جا رہی ہے۔ا ان خیالات کا اظہار انھوں نے کانفرنس روم، دفتر ڈپٹی کمشنر سیالکوٹ میں منعقدہ اجلاس کی صدارت کرتے ہوئے کیا۔ ڈپٹی کمشنر سیالکوٹ اویس مشتاق، ایڈیشنل ڈپٹی کمشنر میونسپل سروسز میاں سرمد حسین اور ایم ڈی واسا فیصل شہزاد بھی اجلاس میں موجود تھے۔ اجلاس میں مثالی گاؤں، سیوریج کے نظام اور دیگر جاری ترقیاتی منصوبوں کے حوالے سے تفصیلی بریفنگ دی گئی۔ میاں ذیشان رفیق نے کہا کہ ستھرا پنجاب وزیر اعلیٰ پنجاب مریم نواز شریف کا فلیگ شپ منصوبہ ہے، اس میں کسی قسم کی کوتاہی یا غفلت کی کوئی گنجائش نہیں جبکہ منصوبے پر زیرو ٹالرنس پالیسی کے تحت عملدرآمد یقینی بنایا جا رہا ہے۔ انہوں نے ہدایت کی کہ ستھرا پنجاب کے تحت ہر بیٹ کا روزانہ کا مقررہ ہدف ہر صورت مکمل کیا جائے۔ انہوں نے کہا کہ کسی بھی علاقے میں گندگی کے ڈھیر موجود ہوں تو انہیں فوری طور پر اٹھانے کے لئے اضافی لیبر تعینات کی جائے اور صفائی کے کام میں کسی قسم کی کوتاہی برداشت نہ کی جائے۔
انہوں نے کہا کہ شہریوں کی ہر شکایت پر بروقت کارروائی مکمل کی جائے اور غفلت یا کوتاہی کی صورت میں ذمہ داروں کے خلاف فوری کارروائی عمل میں لائی جائے گی۔ انہوں نے کہا کہ وہ اچانک فیلڈ دورے کرکے صفائی کے نظام اور عملی اقدامات کا خود جائزہ لیں گے۔میاں ذیشان رفیق نے کہا کہ اربن اور رورل یونین کونسلز میں مکمل کوآرڈینیشن کے ساتھ کام کیا جائے، صفائی ورکرز کی کارکردگی کی مؤثر نگرانی کی جائے، شکایات پر بہتر فالو اَپ یقینی بنایا جائے اور صفائی کے نظام کی مسلسل مانیٹرنگ کی جائے۔ انہوں نے کہا کہ 12 ربیع الاول کے جلوسوں کے روٹس پر مکمل صفائی یقینی بنائی جائے، جبکہ بارش کی صورت میں روٹس سے فوری نکاسی آب اور صفائی کے لئے جامع منصوبہ پہلے سے تیار رکھا جائے۔