سی ٹی او کائنات اظہر خان کی زونل ڈی ایس پیز کو روزانہ رپورٹ پیش کرنے کی ہدایت، ٹریفک قوانین کی خلاف ورزی پر بلاامتیاز کارروائی جاری
اسلام آباد:(رپورٹ حاجی شفیق)
اسلام آباد ٹریفک پولیس نے وفاقی دارالحکومت میں ٹریفک کی روانی کو برقرار رکھنے اور روڈ سیفٹی کو یقینی بنانے کے لیے غیر قانونی طور پر داخل ہونے والے رکشوں کے خلاف ایک خصوصی اور سخت کریک ڈاؤن کا آغاز کر دیا ہے۔
ترجمان اسلام آباد پولیس کے مطابق، آئی جی اسلام آباد سید علی ناصر رضوی کی خصوصی ہدایات پر رورل علاقوں سمیت مختلف اہم مقامات پر خصوصی ٹیمیں تشکیل دی گئی ہیں۔ گزشتہ ایک ہفتے کے دوران کی جانے والی کارروائیوں میں ٹریفک قوانین کی خلاف ورزی کرنے والے 400 سے زائد رکشہ ڈرائیوروں کو چالان ٹکٹ جاری کیے گئے، جبکہ غیر قانونی طور پر دائرہ اختیار میں داخل ہونے والے 150 سے زائد رکشے مختلف تھانوں میں بند کر دیے گئے ہیں۔
اہم شاہراہوں پر خصوصی ناکہ جات اور سخت احکامات
ٹریفک پولیس کی جانب سے شہر کی اہم شریانوں بشمول ایکسپریس وے، کرنل شیر خان ایونیو، مری روڈ، سیونتھ ایونیو اور نائنتھ ایونیو پر خصوصی ناکہ جات قائم کیے گئے ہیں تاکہ غیر قانونی داخلے کو روکا جا سکے۔
چیف ٹریفک آفیسر (سی ٹی او) اسلام آباد کائنات اظہر خان نے تمام رکشہ ڈرائیورز کو ہدایت کی ہے کہ وہ اپنے مقررہ روٹس اور ٹریفک قوانین کی مکمل پابندی کریں اور غیر قانونی داخلے سے گریز کریں۔ انہوں نے تمام زونل ڈی ایس پیز کو سختی سے ہدایت کی ہے کہ وہ اس کارروائی کی روزانہ کی بنیاد پر کارکردگی رپورٹ پیش کریں۔ سی ٹی او کا کہنا تھا کہ اس بلاامتیاز کارروائی کا بنیادی مقصد شہریوں کو سڑکوں پر حادثات سے محفوظ رکھنا اور دارالحکومت میں ٹریفک کے نظام کو منظم بنانا ہے۔
ایک طرف جہاں غیر قانونی رکشوں کے خلاف قانونی شکنجہ کسا جا رہا ہے، وہیں دوسری جانب ٹریفک پولیس کا ایجوکیشن ونگ شہریوں اور ڈرائیورز کو روڈ سیفٹی کے اصولوں سے روشناس کرانے کے لیے روزانہ کی بنیاد پر بیداری مہم بھی چلا رہا ہے۔ اس کے علاوہ اسلام آباد کیپیٹل پولیس ریڈیو ایف ایم 92.4 پر خصوصی پروگرامز کے ذریعے بھی شہریوں کو ٹریفک قوانین کے بارے میں آگاہ کیا جا رہا ہے تاکہ شہریوں کی جان و مال کا تحفظ یقینی بنایا جا سکے۔