چکوال: رپورٹ: جلیل نقوی
ڈائریکٹر جنرل پنجاب فوڈ اتھارٹی کی خصوصی ہدایات پر فوڈ اتھارٹی چکوال نے ضلع بھر میں ملاوٹ کے خاتمے اور معیاری خوراک کی فراہمی یقینی بنانے کے لیے کارروائیاں مزید تیز کر دیں۔ ڈپٹی ڈائریکٹر آپریشنز مہتاب خان کی نگرانی میں فوڈ سیفٹی ٹیموں نے سبزی منڈی چکوال میں مختلف کریانہ اسٹورز اور ٹریڈرز کا معائنہ کیا، جہاں سرکاری پبلک اینالسٹ لیبارٹری سے فیل قرار دی گئی بچوں کی مختلف کنفیکشنری مصنوعات برآمد ہونے پر فوری کارروائی کی گئی۔ رپورٹ کے مطابق ایک پروڈکٹ میں مصنوعی مٹھاس شامل ہونے کے باوجود اس کا لیبل پر ذکر نہیں کیا گیا، جبکہ دوسری مصنوعات پر لازمی لیبلنگ معلومات بھی موجود نہیں تھیں، جو فوڈ سیفٹی قوانین کی خلاف ورزی ہے۔ کارروائی کے دوران تقریباً 115 کلوگرام (3 من) غیر معیاری کنفیکشنری مصنوعات، جن کی مالیت تقریباً 54 ہزار روپے تھی، موقع پر تلف کر دی گئیں، جبکہ مختلف خلاف ورزیوں پر ٹریڈرز کو مجموعی طور پر 60 ہزار روپے کے جرمانے بھی عائد کیے گئے۔ اس موقع پر ڈپٹی ڈائریکٹر آپریشنز مہتاب خان نے کہا کہ بچوں کی صحت اور محفوظ خوراک کی فراہمی پنجاب فوڈ اتھارٹی کی اولین ترجیح ہے، لہٰذا غیر معیاری، ناقص اور گمراہ کن لیبلنگ والی اشیائے خورونوش فروخت کرنے والوں کے خلاف بلاامتیاز کارروائیاں جاری رہیں گی۔ انہوں نے شہریوں پر زور دیا کہ بچوں کے لیے خوراک خریدتے وقت صرف معیاری، رجسٹرڈ اور درست لیبل والی مصنوعات کا انتخاب کریں۔