کوئٹہ:بلوچستان میں سیکیورٹی فورسز نے دہشت گردوں کے خلاف بڑی کارروائی کرتے ہوئے ’فتنہ الہندوستان‘ سے تعلق رکھنے والے ایک اہم دہشت گرد حبیب اللہ کو گرفتار کر لیا ہے۔ گرفتار ہونے والے دہشت گرد نے دورانِ تفتیش تنظیم کے بھیانک عزائم، بھرتی کے طریقوں اور ملک دشمن کارروائیوں کے حوالے سے ہوشربا انکشافات کیے ہیں۔
صوبہ بلوچستان کے ضلع خضدار کی تحصیل اورناچ سے تعلق رکھنے والے حبیب اللہ نے اعتراف کیا کہ دہشت گرد تنظیم نے اسے پہلے جھوٹے وعدوں اور مالی لالچ کے ذریعے اپنے جال میں پھنسایا اور بعد ازاں فکری ذہن سازی کرکے دہشت گردانہ کارروائیوں کے لیے تیار کیا۔ حبیب اللہ کے مطابق اسے ابتدا میں ’چنل دشت‘ منتقل کیا گیا جہاں اس کا برین واش کیا گیا، اور پھر ’سرگڑھ کیمپ‘ میں اسے اسلحہ چلانے، بارودی مواد کا استعمال کرنے، گھات لگا کر حملے کرنے، اپنی شناخت چھپانے اور فرار ہونے کی خصوصی تربیت دی گئی۔
صرف 25 ہزار روپے کے عوض غداری:
گرفتار دہشت گرد نے انکشاف کیا کہ تنظیم نے اسے محض 25 ہزار روپے کی معمولی رقم کے عوض اپنے ہی بلوچ بھائیوں کے خلاف استعمال کیا۔ اس نے بتایا کہ وہ خضدار، بیلہ، نال اور سنارو کے مختلف کیمپوں سے جڑی دہشت گرد کارروائیوں میں براہِ راست شریک رہا ہے۔ اس کے اعتراف کے مطابق، خضدار پولیس چیک پوسٹ پر کیے گئے ایک حملے کے دوران دہشت گردوں کی اندھا دھند فائرنگ کی زد میں آ کر دو معصوم شہری جاں بحق ہو چکے ہیں۔
حبیب اللہ کا مزید کہنا تھا کہ وہ ’بی وائی سی‘ (BYC) کے دھرنوں کے دوران سیکیورٹی اداروں کی نظر میں آیا، جس کے بعد انٹیلی جنس بیسڈ کارروائی کرتے ہوئے اسے دبوچ لیا گیا۔
گرفتار دہشت گرد نے بتایا کہ تنظیم غریب اور بے روزگار نوجوانوں کو مالی مشکلات کا فائدہ اٹھا کر پھنساتی ہے۔ ابتدا میں انہیں سنہرے خواب دکھائے جاتے ہیں، لیکن ایک بار شامل ہونے کے بعد انہیں بلیک میل کیا جاتا ہے تاکہ وہ واپس نہ جا سکیں۔ اس نے انکشاف کیا کہ جو شخص بھی تنظیم کو چھوڑنے کی کوشش کرتا ہے، اسے بے دردی سے قتل کر دیا جاتا ہے۔ کیمپوں کے اندر خوراک کا بھی کوئی مناسب انتظام نہیں ہوتا اور دہشت گرد قریبی دیہاتوں میں لوٹ مار کر کے اپنی ضروریات پوری کرتے ہیں۔
سیکیورٹی حکام کا کہنا ہے کہ گرفتار دہشت گرد کے انکشافات سے کالعدم تنظیموں کے نیٹ ورک، مالی معاونت اور اندرونی سازشوں کے حوالے سے انتہائی اہم شواہد ہاتھ لگے ہیں، جن کی روشنی میں مزید کارروائیاں کی جا رہی ہیں۔
”صرف25 ہزار“ کے عوض بھائیوں کیخلاف استعمال کیا گیا، دہشت گرد گروہ تنظیم نہیں چھوڑنے دیتے:دہشت گرد حبیب اللہ
