سیالکوٹ ۔سلیم احمد اعوان شیخو
کے ڈائریکٹر جنرل ایف آئی اے ڈاکٹر عثمان انور اور ڈائریکٹر ایف آئی اے گوجرانوالہ زون کی خصوصی ہدایات پرایف آئی اے گوجرانوالہ زون نے پاسپورٹ دفاتر کے باہر سرگرم غیر قانونی ایجنٹ مافیا کے خلاف کریک ڈاؤن کرتے ہوئے 15 ایجنٹ کو گرفتار کر لیا ہے۔ان گرفتار ایجنٹوں نے شہریوں سے پاسپورٹ جلد بنوانے کا جھانسہ دے کر غیر قانونی طور پر رقوم وصول کرتے تھے۔ ابتدائی تحقیقات کے مطابق ان ایجنٹوں کی سرگرمیوں میں پاسپورٹ دفاتر کے بعض ملازمین کی مبینہ ملی بھگت کے شواہد بھی سامنے آئے ہیں جن کی مزید تحقیقات جاری ہیں۔کریک ڈاؤن کے دوران ایف آئی اے گوجرانوالہ سرکل نے 7 ایف آئی اے گجرات سرکل نے 3 جبکہ ایف آئی اے سیالکوٹ سرکل نے 5 ایجنٹوں کو گرفتار کیا۔
ایف آئی اے گوجرانوالہ سرکل کی کارروائی میں گرفتار ایجنٹوں میں حافظ ایوب، محمد افضل، محمد طارق، علی حسن، محمد اسد، جمشید علی اور سجاد علی شامل ہیں۔
ان ایجنٹوں کے خلاف مقدمہ درج کر لیا گیا ہے۔ایف آئی اے گجرات سرکل نے پاسپورٹ آفس منڈی بہاؤالدین کے باہر کارروائی کرتے ہوئے زاہد اقبال، زبیر اسلم اور شہروز علی کو گرفتار کیا۔ان ایجنٹوں کے خلاف مقدمہ درج کر لیا گیا ہے۔جبکہ۔ایف آئی اے سیالکوٹ سرکل کی جانب سے گرفتار کئے گئے 5 ایجنٹوں کے خلاف بھی متعلقہ قانونی دفعات کے تحت مقدمات درج کر کے مزید تفتیش کا آغاز کر دیا گیا ہے۔ایف آئی اے شہریوں سے اپیل کرتی ہے کہ پاسپورٹ یا دیگر سرکاری امور کی انجام دہی کے لیے کسی بھی غیر قانونی ایجنٹ سے رابطہ نہ کریں بلکہ متعلقہ سرکاری دفاتر سے براہِ راست رجوع کریں۔ ایسے عناصر کی اطلاع فوری طور پر ایف آئی اے کو دیں تاکہ ان کے خلاف قانونی کارروائی عمل میں لائی جا سکے۔