دہشت گرد نیٹ ورکس اور ان کے ڈھانچے کو ہر جگہ ختم کریں گے، فیلڈ مارشل

راولپنڈی: چیف آف آرمی اسٹاف اور چیف آف ڈیفنس فورسز، فیلڈ مارشل سید عاصم منیر نے کہا ہے کہ سیکیورٹی فورسز، قانون نافذ کرنے والے اداروں اور عوام کی مشترکہ کوششوں سے بلوچستان میں پائیدار امن یقینی بنایا جائے گا۔ انہوں نے اس عزم کا اعادہ کیا کہ فتنہ الخوارج اور فتنہ الہندوستان کے خلاف کارروائیاں دہشت گردی اور اس کے سہولت کاروں کے مکمل خاتمے تک بلا تعطل جاری رہیں گی۔پاکستان ملک اور عوام کے لیے خطرہ بننے والے دہشت گرد نیٹ ورکس اور ان کے ڈھانچے کو ہر جگہ ختم کرنے کے اپنے عزم پر قائم ہے۔ یہ بات انہوں نے جنرل ہیڈکوارٹرز راولپنڈی میں 20ویں نیشنل ورکشاپ بلوچستان کے شرکاء سے گفتگو کرتے ہوئے کہی۔
آئی ایس پی آرکے مطابق فیلڈ مارشل سید عاصم منیرنے جنرل ہیڈکوارٹرز (جی ایچ کیو) راولپنڈی میں 20ویں نیشنل ورکشاپ بلوچستان کے شرکاء سے ملاقات اور گفتگو کی۔
فیلڈ مارشل سید عاصم منیر نے شرکاء سے خطاب کرتے ہوئے کہا کہ سیکیورٹی فورسز اور قانون نافذ کرنے والے اداروں کی مسلسل کوششیں، عوام کی غیر متزلزل حمایت کے ساتھ مل کر بلوچستان میں پائیدار امن کے قیام کو یقینی بنائیں گی۔
انہوں نے اس عزم کا اعادہ کیا کہ فتنہ الخوارج اور فتنہ الہندوستان کے خلاف کارروائیاں پوری قوت اور عزم کے ساتھ اس وقت تک جاری رہیں گی جب تک پاکستان سے دہشت گردی اور اس کے سہولت کاروں کا مکمل خاتمہ نہیں ہو جاتا۔ انہوں نے کہا کہ پاکستان ملک اور عوام کے لیے خطرہ بننے والے دہشت گرد نیٹ ورکس اور ان کے ڈھانچے کو ہر جگہ ختم کرنے کے اپنے عزم پر قائم ہے۔
فیلڈ مارشل نے کہا کہ بیرونی سرپرستی میں سرگرم عناصر مسلسل بلوچستان میں تشدد کو ہوا دینے، استحکام کو نقصان پہنچانے اور امن کو سبوتاژ کرنے کی کوشش کرتے رہے ہیں، تاہم پاکستان کی مسلح افواج عوام کے اتحاد، حوصلے اور بھرپور تعاون سے ان مذموم عزائم کو ناکام بنائیں گی۔
انہوں نے بلوچستان کو پاکستان کا فخر قرار دیتے ہوئے کہا کہ یہ صوبہ بے پناہ قدرتی وسائل سے مالا مال ہے، جبکہ یہاں کے محب وطن، باصلاحیت اور ثابت قدم عوام اس کا سب سے بڑا سرمایہ ہیں۔ انہوں نے کہا کہ وفاقی اور صوبائی حکومتوں کے جاری ترقیاتی منصوبوں کا مقصد عوام دوست اور جامع حکمت عملی کے ذریعے بلوچستان کی سماجی و معاشی ترقی کو نئی سمت دینا ہے۔
فیلڈ مارشل سید عاصم منیر نے قومی یکجہتی کے فروغ اور بلوچستان میں دیرپا امن و خوشحالی کے لیے سول سوسائٹی، تعلیمی اداروں، میڈیا اور نوجوانوں کے مثبت کردار کو سراہا۔ انہوں نے قومی اتحاد، استقامت اور مشترکہ کوششوں کی ضرورت پر بھی زور دیا تاکہ پاکستان کے روشن مستقبل کی راہ ہموار کی جا سکے۔
سیشن کا اختتام ایک واضح اور وسیع تر بات چیت کے ساتھ ہوا۔ شرکاء نے پاکستان کے استحکام، ترقی اور خودمختاری کے لیے اپنے مشترکہ عزم کا اعادہ کیا۔