ہنرمند پنجاب، خوشحال پاکستان: وزیراعلیٰ مریم نواز کا نوجوانوں کو جدید ٹیکنالوجی سے لیس کرنے کا اعلان

لاہور:وزیراعلیٰ پنجاب مریم نواز شریف نے عالمی یومِ مہارتِ نوجوانان کے موقع پر اپنے پیغام میں اس عزم کا اعادہ کیا ہے کہ پنجاب کے نوجوانوں کو جدید ٹیکنالوجی اور پیشہ ورانہ مہارتوں سے لیس کرکے انہیں ملکی ترقی کا محور بنایا جائے گا۔ ان کا کہنا ہے کہ نوجوان کسی بھی قوم کا سب سے قیمتی اثاثہ ہوتے ہیں اور یہی وہ معمار ہیں جو پاکستان کو معاشی خوشحالی کی راہ پر گامزن کر سکتے ہیں۔
وزیراعلیٰ نے بتایا کہ پنجاب حکومت نے نوجوانوں کو ہنر مند بنانے کے لیے خطیر فنڈز مختص کیے ہیں۔ انہوں نے کہا کہ ‘آسان فنانس سکیم’ کے ذریعے اب تک ایک لاکھ 8 ہزار سے زائد افراد کو قرض فراہم کیے جا چکے ہیں، جس میں نوجوانوں کو 10 لاکھ سے 3 کروڑ روپے تک بلاسود قرضے دیے جا رہے ہیں تاکہ وہ اپنے چھوٹے کاروبار شروع کر سکیں۔
مریم نواز شریف نے بتایا کہ پنجاب حکومت نے تعلیمی نصاب میں پہلی مرتبہ ای-کامرس، ڈیجیٹل مارکیٹنگ اور جدید آئی ٹی کورسز شامل کیے ہیں۔ انہوں نے بتایا کہ صوبے کے وکیشنل ٹریننگ انسٹیٹیوٹس میں عالمی معیار کے مطابق کنسٹرکشن، ویلڈنگ، ٹائل فکسنگ اور ہیوی وہیکل مینٹیننس جیسے جدید ہنر سکھائے جا رہے ہیں۔ ان کا مزید کہنا تھا کہ اب تک 10 ہزار نوجوانوں کو سعودی عرب اور خلیجی ممالک میں بین الاقوامی معیار کی ملازمتیں فراہم کی جا چکی ہیں۔
وزیراعلیٰ نے خاص طور پر ‘سحر پروگرام’ کا ذکر کرتے ہوئے کہا کہ اس کے تحت 5,365 خواتین کو بیوٹیفکیشن، ہاسپیٹلٹی اور ایئرلائن مینجمنٹ کے کورسز کروائے جا رہے ہیں۔ ان خواتین کو مفت لیپ ٹاپ اور 7,500 روپے ماہانہ وظیفہ بھی دیا جا رہا ہے تاکہ وہ باعزت روزگار کما سکیں۔ ایگریکلچر انٹرن شپ پروگرام کے حوالے سے انہوں نے بتایا کہ 2 ہزار نوجوانوں کو 60 ہزار روپے ماہانہ وظیفہ دیا جا رہا ہے تاکہ وہ زراعت کے شعبے میں جدید ٹیکنالوجی کو فروغ دیں۔
وزیراعلیٰ پنجاب نے نوجوانوں پر زور دیا کہ وہ فری لانسنگ، آئی ٹی اور تکنیکی شعبوں میں شمولیت اختیار کریں کیونکہ جدید دور کا تقاضا صرف ڈگری نہیں بلکہ ہنر ہے۔ انہوں نے یقین دلایا کہ پنجاب حکومت ہنرمند نوجوانوں کے لیے ہر ممکن سہولیات فراہم کرنے کے لیے پرعزم ہے۔