ملتان (ڈویژن بیورو چیف ملک جابر عباس سے)
ملتان کے علاقے چونگی نمبر 22 کے قریب زیرِ تعمیر دکان کی گارڈر اور ٹی آئرن سے تیار کی جانے والی چھت اچانک منہدم ہو گئی، جس کے نتیجے میں وہاں کام کرنے والے مزدوروں سمیت مجموعی طور پر 6 افراد زخمی ہو گئے۔
حادثے کی اطلاع ملتے ہی ریسکیو 1122 کی امدادی ٹیمیں موقع پر پہنچ گئیں اور فوری طور پر ریسکیو آپریشن شروع کیا۔ امدادی اہلکاروں نے زخمیوں کو ملبے سے نکال کر ابتدائی طبی امداد فراہم کی۔ شدید زخمی مزدور اعجاز ولد کالو (45 سال) اور جعفر ولد ممتاز (26 سال) کو مزید علاج کے لیے نشتر ہسپتال منتقل کر دیا گیا، جبکہ دیگر معمولی زخمی افراد کو موقع پر ہی طبی امداد دی گئی۔
عینی شاہدین کے مطابق چھت گرنے کے باعث علاقے میں کچھ دیر کے لیے خوف و ہراس پھیل گیا، تاہم ریسکیو ٹیموں نے بروقت کارروائی کرتے ہوئے صورتحال کو قابو میں لے لیا۔
ماہرین کا کہنا ہے کہ زیرِ تعمیر عمارتوں میں حفاظتی انتظامات، معیاری تعمیراتی سامان کے استعمال اور حفاظتی اصولوں پر سختی سے عملدرآمد ایسے حادثات کی روک تھام کے لیے ناگزیر ہے۔