منچن آباد(راشد ڈھڈی)
منچن آباد میں غلہ منڈی کی ہڑتال ساتویں روز بھی جاری ہے۔ آڑھتی، تاجر اور مزدور سراپا احتجاج ہیں۔ مظاہرین کا کہنا ہے کہ جھوٹی ایف آئی آر ختم ہونے تک ہڑتال جاری رہے گی، جبکہ حکومتی سطح پر تاحال کوئی پیش رفت سامنے نہیں آئی۔منچن آباد کی غلہ منڈی میں ہڑتال کے باعث کاروبار مکمل طور پر بند ہے۔ سات روز گزرنے کے باوجود مسئلہ حل نہ ہونے سے مزدور شدید مالی مشکلات کا شکار ہیں۔ متاثرہ مزدوروں کا کہنا ہے کہ گھروں کے چولہے ٹھنڈے پڑ چکے ہیں اور کئی خاندان فاقوں تک پہنچ گئے ہیں۔ جنرل سیکرٹری محمد احمد فاضلکا وٹو نے مطالبہ کیا کہ جھوٹی ایف آئی آر فوری ختم کی جائے، بصورت دیگر احتجاج کا دائرہ مزید بڑھایا جائے گا۔ مظاہرین نے حکومت سے فوری نوٹس لے کر مسئلے کا حل نکالنے کی اپیل کی ہے۔