نوابشاہ (رپورٹ: نفیس آرائیں)
ہاری ویلفیئر ایسوسی ایشن کے زیرِ اہتمام نوابشاہ میں نوجوانوں کے لیے ایک انٹرایکٹو سیشن اور سی ایس ایس کوالیفائر و پی ایس پی آفیسر خیم چند کے اعزاز میں سیمینار منعقد کیا گیا، جس میں مختلف علاقوں سے تعلق رکھنے والے طلبہ و طالبات اور سی ایس ایس و پی سی ایس کے امیدواروں نے بڑی تعداد میں شرکت کی۔خیم چند نے سی ایس ایس میں کامیابی کے حوالے سے اپنے تجربات بیان کرتے ہوئے شرکاء کے سوالات کے جوابات دیے۔ تقریب میں پی سی ایس کامیاب امیدوار ندیم رند، صدارتی ایوارڈ تمغۂ امتیاز یافتہ سماجی رہنما حاجی عابد لاشاری اور استاد غلام نبی کیریو کو بھی خراجِ تحسین پیش کیا گیا۔اس موقع پر ہاری ویلفیئر ایسوسی ایشن کے ایگزیکٹو ڈائریکٹر اکرم خاصخیلی نے کہا کہ خیم چند کی کامیابی محنت کش اور پسماندہ طبقات کے لاکھوں نوجوانوں کے لیے ایک روشن مثال ہے۔ انہوں نے نوجوانوں پر زور دیا کہ وہ ثابت قدمی، محنت اور جدوجہد کے ذریعے اپنے خوابوں کو شرمندۂ تعبیر کریں۔خیم چند نے اپنے خطاب میں کہا کہ کامیابی کے حصول کے لیے مسلسل محنت اور عزم ناگزیر ہے۔ انہوں نے بتایا کہ انہیں سی ایس ایس امتحان میں دو مرتبہ ناکامی کا سامنا کرنا پڑا، تاہم مستقل مزاجی اور انتھک کوشش کے باعث تیسری مرتبہ کامیابی حاصل کرنے میں کامیاب ہوئے۔