راولپنڈی: انٹیلی جنس بنیادوں پر کیے جانے والے آپریشنز کے تسلسل میں سیکیورٹی فورسز نے شمالی وزیرستان کے علاقے میران شاہ میں خوارج کے متعدد ٹھکانوں کو نشانہ بنایا ہے۔
آئی ایس پی آر کے مطابق گزشتہ 72 گھنٹوں کے دوران ہونے والے شدید فائرنگ کے تبادلوں میں بھارتی سرپرستی میں سرگرم فتنہ الخوارج سے تعلق رکھنے والے 27 خوارج کو ہلاک کر دیا گیا ہے۔
بیان میں کہا گیا ہے کہ ہلاک ہونے والے خوارج کے قبضے سے اسلحہ اور گولہ بارود بھی برآمد کیا گیا۔ یہ عناصر متعدد دہشت گرد کارروائیوں اور بے گناہ شہریوں کی ٹارگٹ کلنگ میں ملوث تھے۔
آئی ایس پی آر کے مطابق اس گروہ کے خاتمے سے میران شاہ میں ممتاز شخصیت شہید ملک سیف اللہ داوڑ کی ٹارگٹ کلنگ کا بدلہ لے لیا گیا ہے اور اس گھناؤنے جرم میں ملوث عناصر کو انجام تک پہنچا دیا گیا ہے۔
بیان میں مزید کہا گیا ہے کہ علاقے میں چھپے ہوئے باقی ماندہ خوارج کے خاتمے کے لیے کلیئرنس اور سینیٹائزیشن آپریشنز جاری ہیں۔ سیکیورٹی فورسز اور قانون نافذ کرنے والے ادارے قومی ایکشن پلان کے تحت وفاقی ایپکس کمیٹی سے منظور شدہ وژن "عزمِ استحکام” کے مطابق دہشت گردی کے خلاف اپنی بھرپور مہم جاری رکھیں گے تاکہ ملک سے بیرونی سرپرستی اور معاونت سے چلنے والی دہشت گردی کے ناسور کا مکمل خاتمہ کیا جا سکے۔
صدر اور وزیراعظم کا فتنہ الخوارج کے خلاف کامیاب کارروائیوں پر سیکیورٹی فورسز کو خراجِ تحسین
صدرِ مملکت آصف علی زرداری اور وزیراعظم محمد شہباز شریف نے شمالی وزیرستان میں فتنہ الخوارج کے خلاف کامیاب آپریشنز پر سیکیورٹی فورسز کی پیشہ ورانہ صلاحیتوں اور جرات کو سراہتے ہوئے انہیں خراجِ تحسین پیش کیا ہے۔
ایوانِ صدر سے جاری بیان کے مطابق صدر آصف علی زرداری نے گزشتہ 72 گھنٹوں کے دوران 27 بھارتی سرپرستی میں سرگرم خوارج کو ہلاک کرنے پر سیکیورٹی فورسز کی کامیاب کارروائیوں کو سراہا۔ صدرِ مملکت نے کہا کہ شہید ملک سیف اللہ داوڑ کے قاتلوں کے خلاف کامیاب آپریشن دہشت گردی کے خلاف جاری قومی جدوجہد میں ایک اہم پیش رفت ہے۔
صدر زرداری نے کہا کہ پوری قوم اپنی بہادر سیکیورٹی فورسز کے شانہ بشانہ کھڑی ہے اور ملک سے دہشت گردی کے مکمل خاتمے کے لیے پُرعزم ہے۔
دوسری جانب وزیراعظم شہباز شریف نے بھی شمالی وزیرستان میں کامیاب آپریشنز پر سیکیورٹی فورسز کو خراجِ تحسین پیش کرتے ہوئے گزشتہ 72 گھنٹوں کے دوران 27 فتنۃ الخوارج دہشت گردوں کی ہلاکت پر فورسز کی کارکردگی کو سراہا۔
وزیراعظم نے کہا کہ قوم کو اپنے بہادر سیکیورٹی فورسز کے جوانوں پر فخر ہے اور فتنۃ الخوارج سمیت ان کے سرپرستوں کے ناپاک عزائم ہر قیمت پر ناکام بنائے جائیں گے۔ انہوں نے شہید ملک سیف اللہ داوڑ کے قاتلوں کو انجام تک پہنچانے پر اطمینان کا اظہار بھی کیا۔
شہباز شریف نے کہا کہ دہشت گردی کے مکمل خاتمے تک سیکیورٹی فورسز اور قانون نافذ کرنے والے اداروں کی کارروائیاں جاری رہیں گی۔ انہوں نے اس عزم کا اعادہ کیا کہ "عزمِ استحکام” کے تحت دہشت گردی کے خلاف جنگ کو منطقی انجام تک پہنچایا جائے گا۔