سکھر (رپورٹ: عبد الرحمان راجپوت)
محرم الحرام کی آمد کے پیشِ نظر اسسٹنٹ کمشنر سکھر سٹی نے مرکزی امام بارگاہ سکھر کا تفصیلی دورہ کیا اور مجالسِ عزا و عزاداری کے دوران درپیش ممکنہ مسائل، انتظامی امور اور جاری ترقیاتی کاموں کا جائزہ لیا۔دورے کے دوران محکمہ بلڈنگز کے ایس ڈی او اور ایکس ای این بھی ان کے ہمراہ موجود تھے۔ وفد نے سالانہ ترقیاتی پروگرام (ADP) کے تحت جاری مرمتی اور تعمیراتی کاموں کا معائنہ کیا اور مختلف شعبوں کا تفصیلی جائزہ لیتے ہوئے متعلقہ حکام کو ضروری ہدایات جاری کیں۔اس موقع پر اسسٹنٹ کمشنر سکھر نے زور دیا کہ محرم الحرام کے دوران عزاداروں کو ہر ممکن سہولیات کی فراہمی اور پرامن ماحول کی یقینی فراہمی انتظامیہ کی اولین ترجیح ہے۔ انہوں نے متعلقہ افسران کو ہدایت کی کہ جاری ترقیاتی منصوبوں کو مقررہ وقت کے اندر مکمل کیا جائے تاکہ عزاداروں کو کسی قسم کی دشواری کا سامنا نہ کرنا پڑےمعائنے کے دوران یہ فیصلہ بھی کیا گیا کہ متعلقہ ٹھیکیدار کو پابند بنایا جائے گا کہ خواتین کے حصے کے لیے زیرِ تعمیر باؤنڈری وال کا کام محرم الحرام کے آغاز سے قبل ہر صورت مکمل کیا جائے۔ انتظامیہ کا مؤقف تھا کہ باؤنڈری وال کی تکمیل سے خواتین عزاداروں کو بہتر سہولیات، مناسب رازداری اور محفوظ ماحول میسر آئے گا۔