دوران ڈکیتی مزاحمت پر نوجوان کو فائر مار کر شدید زخمی کر دیا گیامقدمہ تاحال درج نہ ہو سکا

شیخوپورہ (رپورٹ اسامہ طفیل) شیخوپورہ کے علاقہ حیدر ٹاؤن، تھانہ فیروزوالہ کی حدود میں دوران ڈکیتی مزاحمت پر نوجوان کو فائر مار کر شدید زخمی کر دیا گیا، زخمی کو تشویشناک حالت میں لاہور کے میو ہسپتال منتقل کر دیا گیا جبکہ واقعہ کا مقدمہ تاحال درج نہ ہو سکا تفصیلات کے مطابق فیروزوالہ کے علاقہ حیدر ٹاؤن کے رہائشی ارباب نامی نوجوان ٹیوب ویل پر نہانے گیا ہوا تھا کہ اسی دوران دو نامعلوم مسلح افراد وہاں پہنچے اور اس سے نقدی اور قیمتی اشیاء طلب کیں۔ اہل خانہ کے مطابق جب ارباب نے بتایا کہ اس کے پاس کچھ موجود نہیں تو ملزمان نے طیش میں آ کر اس پر فائرنگ کر دی جس کے نتیجہ میں وہ شدید زخمی ہو گیا۔واقعہ کے بعد زخمی نوجوان کو ابتدائی طبی امداد کے بعد تشویشناک حالت میں لاہور کے میو ہسپتال منتقل کر دیا گیا جہاں اسے طبی سہولیات فراہم کی جا رہی ہیں مضروب کے چچا محمد فیاض کا کہنا تھا کہ ملزمان واردات کے بعد موقع سے فرار ہو گئے جبکہ پولیس کی جانب سے تاحال مقدمہ درج نہیں کیا گیا۔ انہوں نے وزیر اعلیٰ پنجاب اور اعلیٰ پولیس حکام سے فوری نوٹس لینے اور ملزمان کی گرفتاری کے ساتھ انصاف فراہم کرنے کا مطالبہ کیا ہے۔