چکوال: خستہ حال مکان کی چھت گرنے سے نوجوان جاں بحق، والد شدید زخمی

چکوال (بیورو چیف جلیل نقوی): جہلم روڈ پر واقع گاؤں بڈھیال میں ایک افسوسناک حادثہ پیش آیا جہاں پرانے مکان کی مرمت کے دوران خستہ حال چھت اچانک گر گئی، جس کے نتیجے میں باپ اور بیٹا ملبے تلے دب گئے۔ذرائع کے مطابق مکان کی دیواروں میں دراڑیں آنے کے باعث مرمت کا کام جاری تھا کہ اسی دوران بوسیدہ چھت اچانک منہدم ہو گئی۔ حادثے کے فوراً بعد علاقہ مکینوں اور ریسکیو اہلکاروں نے امدادی کارروائیاں شروع کر دیں۔ریسکیو ٹیموں نے طویل آپریشن کے بعد ملبے تلے دبے 62 سالہ ظفر اقبال ولد محمد بشیر کو شدید زخمی حالت میں نکال لیا، جنہیں فوری طور پر ڈسٹرکٹ ہیڈکوارٹر ہسپتال چکوال منتقل کر دیا گیا۔ زخمی شخص کی ٹانگ میں فریکچر جبکہ جسم کے مختلف حصوں پر گہرے زخم آئے ہیں۔بعد ازاں ملبے سے 18 سالہ محمد رضوان ولد ظفر اقبال کو بھی نکالا گیا تاہم وہ جانبر نہ ہو سکے اور موقع پر ہی دم توڑ گئے۔مقامی ذرائع کے مطابق حادثہ خستہ حال چھت اور حفاظتی اقدامات نہ ہونے کے باعث پیش آیا۔ واقعے کے بعد علاقے میں فضا سوگوار ہو گئی جبکہ اہل علاقہ نے پرانی اور بوسیدہ عمارتوں کی مرمت کے دوران حفاظتی تدابیر اختیار کرنے کی ضرورت پر زور دیا۔