لاہور: پاکستان مسلم لیگ (ن) کے ارکانِ پنجاب اسمبلی نے سینیئر صوبائی وزیر مریم اورنگزیب سے ایک اہم ملاقات کی، جس میں صوبے بھر کے مختلف اضلاع میں جاری ترقیاتی کاموں اور حکومتی کارکردگی پر تفصیلی تبادلہ خیال کیا گیا۔ ملاقات میں شریک ارکان نے وزیراعلیٰ مریم نواز شریف کے وژن اور عوامی خدمت کے جذبے کو سراہتے ہوئے اسے پنجاب کی تاریخ کا ایک روشن باب قرار دیا۔
اس ملاقات میں مسلم لیگ (ن) کے درجنوں ارکان سمیت پیپلز پارٹی کے نمائندے بھی شامل تھے۔ اہم شرکاء میں افتخار نذیر، راجہ قمرالاسلام، عامر طلال گوپانگ، اور جعفر علی ہوچا ملک لال جویہ، نوید اشرف، سردار منصب علی ڈوگر، اور پیر اشرف رسولخان بہادر ڈوگر، سعدیہ مظفر، میاں عمران جاوید، سلطان رانجھا، اور رانا راشدعمران اکرم، ملک شہریار، حمیدہ وحیدالدین، اور رئیس نبیل (پی پی پی)رئیس اعجاز نون، چوہدری شیر علی خان، عدنان افضل چٹھہ، مدد علی شاہ، شاذیہ حیات، خالد ججا، رانا فیض، سبطین بخاری اور بی بی وڈیری شامل تھے۔
ارکانِ اسمبلی نے وزیراعلیٰ پنجاب کے مختلف شعبوں میں کیے گئے اقدامات کو مثالی قرار دیتے 30 ہزار کلومیٹر سڑکوں کی تعمیر کو وزیراعلیٰ کا ایک بڑا تاریخی کارنامہ قرار دیا گیا۔ جبکہ ارکان کا کہنا تھا کہ "ستھرا پنجاب” پروگرام کی مثال پوری دنیا اور خطے میں نہیں ملتی۔اسی طرح ارکان اسمبلی نے اظہار خیال کرتے ہوئے کہا کہ کلین انرجی الیکٹرو بسوں کے آغاز سے نہ صرف ماحول بہتر ہوگا بلکہ عوام کو سفری سہولیات بھی میسر آئیں گی۔
پہلی بار سیاسی وابستگیوں کو بالائے طاق رکھ کر ہر ضلع اور ڈویژن میں مساوی بنیادوں پر ترقیاتی کام ہو رہے ہیں۔
ملاقات کے دوران صوبے میں جرائم پر قابو پانے کے لیے کیے گئے موثر اقدامات اور ماحولیاتی بہتری کے لیے کی جانے والی قانون سازی کو بھی خوب سراہا گیا۔ ارکانِ اسمبلی کے مطابق، صحت اور تعلیم کے پورے نظام کی "اوور ہالنگ” اور سیوریج کے نظام میں تبدیلی مریم نواز شریف کی عوامی خدمت کا منہ بولتا ثبوت ہے۔