کیلے فورنیا :امریکی ٹیکنالوجی کمپنی ایپل کے چیف ایگزیکٹیو آفیسر (سی ای و) ٹِم کُک نے عہدہ چھوڑنے کا فیصلہ کر لیا ہے۔
منگل کے روز ایپل کی ویب سائٹ پر جاری کی گئی پریس ریلیز میں اعلان کیا گیا کہ ٹِم کُک کمپنی کے بورڈ آف ڈائریکٹرز کے ایگزیکٹیو چیئرمین بن جائیں گے جبکہ جان ٹرنَس جو اس وقت سینیئر نائب صدر برائے ہارڈویئر انجینیئرنگ ہیں، یکم ستمبر 2026 سے ایپل کے نئے چیف ایگزیکٹیو آفیسر کا عہدہ سنبھالیں گے۔
ٹِم کُک موسمِ گرما تک بطور چیف ایگزیکٹیو آفیسر اپنی ذمہ داریاں انجام دیتے رہیں گے اور اس دوران وہ جان ٹرنَس کے ساتھ مل کر ہموار منتقلی کو یقینی بنائیں گے۔ ایگزیکٹیو چیئرمین کے طور پر وہ کمپنی کے مختلف امور میں معاونت کریں گے جن میں دنیا بھر کے پالیسی سازوں سے رابطہ بھی شامل ہوگا۔
ٹِم کُک نے کہ ’میری زندگی کا سب سے بڑا اعزاز یہ رہا کہ میں ایپل کا چیف ایگزیکٹیو آفیسر رہا اور مجھے اس غیرمعمولی کمپنی کی قیادت سونپی گئی۔ میں ایپل سے دل و جان سے محبت کرتا ہوں اور اس بات پر بے حد شکر گزار ہوں کہ مجھے ایسے ذہین، تخلیقی اور مخلص لوگوں کے ساتھ کام کرنے کا موقع ملا جو ہمارے صارفین کی زندگی بہتر بنانے اور بہترین مصنوعات و خدمات بنانے کے لیے ہمیشہ پُرعزم رہے۔‘
ایپل کے نئے سی ای او جان ٹرنس کون ہیں ؟
’جان ٹرنَس میں ایک انجینیئر کی سوچ، ایک موجد کی روح اور دیانت داری کے ساتھ قیادت کرنے والا دل موجود ہے۔ وہ ایک وژن رکھنے والے رہنما ہیں جن کی گزشتہ 25 برسوں میں بے شمار خدمات ہیں۔ مجھے مکمل یقین ہے کہ وہ ایپل کو مستقبل کی جانب لے جانے کے لیے بہترین انتخاب ہیں اور میں ان کے ساتھ اس منتقلی کے دوران اور اپنے نئے کردار میں کام کرنے کا منتظر ہوں۔‘دوسری جانب آرتھر لیونسن جو گزشتہ 15 برس سے نان ایگزیکٹیو چیئرمین رہے ہیں، یکم ستمبر 2026 سے لیڈ انڈیپنڈنٹ ڈائریکٹر کا کردار سنبھالیں گے جبکہ جان ٹرنَس اسی تاریخ سے بورڈ آف ڈائریکٹرز کا حصہ بھی بن جائیں گے۔ٹِم کُک 1998 میں ایپل میں شامل ہوئے اور 2011 میں چیف ایگزیکٹیو آفیسر بنے۔ ان کی قیادت میں ایپل نے متعدد مصنوعات اور خدمات متعارف کروائیں جن میں ایپل واچ، ایئر پوڈز اور ایپل وژن پرو شامل ہیں جبکہ آئی کلاؤڈ، ایپل پے، ایپل ٹی وی اور ایپل میوزک جیسی سروسز بھی متعارف ہوئیں۔
ان کے دور میں ایپل کی مارکیٹ ویلیو تقریباً 350 ارب ڈالر سے بڑھ کر 4 ٹریلین ڈالر تک پہنچ گئی یعنی 1000 فیصد سے زائد اضافہ ہوا جبکہ سالانہ آمدنی 2011 کے 108 ارب ڈالر سے بڑھ کر 2025 میں 416 ارب ڈالر سے تجاوز کر گئی۔
جان ٹرنَس 2001 میں ایپل سے وابستہ ہوئے، 2013 میں نائب صدر برائے ہارڈویئر انجینیئرنگ بنے اور 2021 میں ایگزیکٹیو ٹیم کا حصہ بنے۔ انہوں نے آئی فون، آئی پیڈ، میک اور ایپل واچ سمیت متعدد مصنوعات کی ہارڈویئر انجینئرنگ کی قیادت کی۔
میک کمپیوٹرز کی ترقی میں ان کا کردار اہم رہا، جبکہ حالیہ مصنوعات جیسے میک بک نیو اور آئی فون 17 سیریز بھی ان کی ٹیم کی کوششوں کا نتیجہ ہیں۔ ان کی قیادت میں ایئر پوڈز کو مزید بہتر بنایا گیا اور انہیں صحت سے متعلق استعمال کے قابل بھی بنایا گیا۔
انہوں نے مصنوعات کی مضبوطی، پائیداری اور ماحول دوست ڈیزائن میں بھی اہم کردار ادا کیا، جن میں ری سائیکل ایلومینیم، تھری ڈی پرنٹڈ ٹائٹینیم اور مرمت کے بہتر نظام شامل ہیں۔
ایپل سے قبل وہ ورچوئل ریسرچ سسٹمز میں مکینیکل انجینیئر کے طور پر کام کر چکے ہیں اور انہوں نے یونیورسٹی آف پنسلوینیا سے مکینیکل انجینیئرنگ میں بیچلر ڈگری حاصل کر رکھی ہے۔
ایپل کو اربوں سے کھربوں کی کمپنی بنانے والے سی ای او کا استعفا، نیا CEO کون ہوگا؟
