بال اب ایران کے کورٹ میں، فیلڈ مارشل عاصم منیر ،وزیراعظم شہباز شریف کا اہم کردار ہے ، جے ڈی وینس

واشنگٹن: امریکی نائب صدر جے ڈی وینس نے کہا کہ ایران کیساتھ مذاکرات میں کافی پیشرفت ہوئی ہے، گیند اب ایران کے کورٹ میں ہے۔
امریکی نائب صدر نے ایک انٹرویو میں مذاکرات کے دوسرے دور پر سوال پر جواب میں کہا، امید ہے کہ ایران آبنائے ہرمز کھولنے کیلئے پیشرفت کرے گا۔ ایران کو جوہری ہتھیار حاصل کرنے کی کوشش نہیں کرنی چاہیے۔جے ڈی وینس نے کہا کہ ایرانیوں سے کہا کہ انہیں ملک سے جوہری مواد ہٹانا ہوگا، ہم نے اپنی ریڈ لائن واضح کردی ہے۔
انہوں نے آبنائے ہرمز کی صورتحال پر بات کرتے ہوئے کہا کہ امریکہ کو توقع ہے کہ ایران اس اہم بحری گزرگاہ کو کھولنے کیلئے اقدامات کرے گا، جو عالمی توانائی کی ترسیل کے لئے نہایت اہم ہے۔انہوں نے مزید کہا کہ اگرچہ مذاکرات میں کچھ پیش رفت ہوئی ہے، لیکن اصل فیصلہ ایران کے ہاتھ میں ہے کہ آیا وہ کسی بڑے معاہدے تک پہنچنے کیلئے مزید پیش قدمی کرتا ہے یا نہیں۔
نائب امریکی صدر نے مصالحت کاری پر وزیراعظم پاکستان اور فیلڈ مارشل کی بھی تعریف کی۔انہوں نے کہا کہ مذاکرات کا کریڈٹ وزیراعظم محمد شہبازشریف اور فیلڈ مارشل سیدعاصم منیرکوجاتاہے۔دونوں رہنماوں نے بہترین میزبانی کی اور امریکہ ایران سفارت کاری میں اہم کردار ادا کیا۔