لاہور :(خرم عباس)
مغلپورہ میں نوجوان شہری شکیل احمد کے اندھے قتل کا معمہ پولیس نے مختصر وقت میں حل کرتے ہوئے دو ملزمان کو گرفتار کر لیا۔ پولیس حکام کے مطابق یہ کارروائی پیشہ وارانہ مہارت، جدید طریقۂ تفتیش اور ہیومن انٹیلیجنس کے مؤثر استعمال کا نتیجہ ہے۔
تفصیلات کے مطابق واقعے کے فوری بعد ایس پی انویسٹی گیشن خالد سعید نے ڈی ایس پی انوسٹی گیشن حسنین حیدر کو ملزمان کی گرفتاری کا ٹاسک سونپا۔ بلائنڈ مرڈر ہونے کے باعث ابتدائی طور پر مقتول کی شناخت ایک بڑا چیلنج تھی، تاہم انچارج انویسٹی گیشن تھانہ مغلپورہ معین الیاس اور ان کی ٹیم نے روایتی طریقوں سے ہٹ کر اقدام کیا۔ پولیس نے جدید ٹیکنالوجی رپورٹس کا انتظار کیے بغیر نامعلوم نعش کی بائیو میٹرک تصدیق کروائی، جس کے ذریعے مقتول کا موبائل نمبر حاصل کیا گیا اور پھر اس سے شناختی کارڈ کی تفصیلات نکالی گئیں۔
مزید تفتیش میں مقتول کا کرمنل ریکارڈ (CRO) چیک کرایا تو جس سے معلوم ہوا کہ وہ ماضی میں چوری، ڈکیتی، منشیات اور بھتہ خوری جیسے سنگین مقدمات میں ملوث رہا تھا اور کئی بار جیل رہ کر آیا مقتول کی شناخت مکمل ہونے کے بعد میت پوسٹمارٹم کے لئے بھجوا دی دوسری جانب پولیس ٹیم نے سی سی ٹی وی کیمروں کی مدد سے ملزمان کی نقل و حرکت کا سراغ لگایا اور مسلسل 24 گھنٹوں کی انتھک محنت کے بعد مرکزی ملزم اور اس کے ساتھی کو گرفتار کر لیا۔ پولیس کے مطابق ملزمان نے معمولی تلخ کلامی پر شکیل احمد کو چھری کے وار کر کے بے دردی سے قتل کیا اور موقع سے فرار ہو گئے تھے۔ ایس پی انویسٹی گیشن خالد سعید کا کہنا ہے کہ ملزمان کو پیشہ وارانہ مہارت اور ہیومن انٹیلیجنس کی بنیاد پر گرفتار کیا گیا ہے، جبکہ ڈی آئی جی انویسٹی گیشن نے ہدایت دی ہے کہ مضبوط چالان مرتب کر کے ملزمان کو قرار واقعی سزا دلوائی جائے گی۔ انہوں نے مزید کہا کہ قانون شکن عناصر کے خلاف آہنی ہاتھوں سے نمٹا جائے گا۔ یہ کارروائی پولیس کی بروقت حکمت عملی اور جدید تفتیشی طریقوں کے مؤثر استعمال کی ایک واضح مثال قرار دی جا رہی ہے۔
مغلپورہ پولیس نے شکیل احمد کے اندھے قتل کا معمہ 24 گھنٹے میں حل کر کے 2 قاتل دھر لیے
