اسلام آباد: وزیراعظم محمد شہباز شریف نے بدھ کی صبح سعودی عرب کے ولی عہد اور وزیر اعظم محمد بن سلمان بن عبدالعزیز آل سعود سے ٹیلیفون پر بات چیت کی۔
وزیر اعظم آفس سے جاری بیان کے ۔طابق وزیراعظم نے گفتگو کے دوران خادم الحرمین الشریفین شاہ سلمان بن عبدالعزیز آل سعود ولی عہد شہزادہ محمد بن سلمان اور سعودی عرب کے برادر عوام کو عیدالفطر کی دلی مبارکباد پیش کی۔ سعودی ولی عہد نے بھی وزیراعظم کو عید کی مبارکباد دی اور نیک تمناؤں کا اظہار کیا۔
وزیراعظم نے سعودی عرب پر حالیہ حملوں کی پاکستان کی جانب سے شدید مذمت کا اعادہ کرتے ہوئے اس مشکل وقت میں مملکت اور اس کے عوام کے ساتھ مکمل یکجہتی اور حمایت کا اظہار کیا۔ انہوں نے موجودہ بحران کے دوران غیر معمولی تحمل کا مظاہرہ کرنے پر سعودی قیادت کو سراہا اور یقین دلایا کہ پاکستان ہمیشہ سعودی عرب اور اس کے عوام کے ساتھ کھڑا رہے گا، جس طرح سعودی عرب ہمیشہ پاکستان کی حمایت کرتا رہا ہے۔
وزیراعظم نے فوری طور پر جنگ کے خاتمے اور حالات کو معمول پر لانے پر زور دیا تاکہ خطے میں استحکام پیدا کیا جا سکے۔ انہوں نے امت مسلمہ کے درمیان اتحاد اور ہم آہنگی کی ضرورت پر بھی زور دیا۔ وزیراعظم نے سعودی ولی عہد کو تمام فریقین کے ساتھ پاکستان کی تعمیری سفارتی کوششوں سے آگاہ کیا جن کا مقصد کشیدگی میں کمی اور مسائل کو مذاکرات و سفارت کاری کے ذریعے حل کرنا ہے۔
سعودی ولی عہد محمد بن سلمان نے پاکستان کی امن کوششوں کو سراہا۔ دونوں رہنماؤں نے دونوں ممالک کے درمیان ہر سطح پر قریبی رابطہ برقرار رکھنے پر اتفاق کیا۔
وزیراعظم شہباز شریف اور سعودی ولی عہد محمد بن سلمان کے درمیان ٹیلیفونک رابطہ،خطے میں کشیدگی کم کرنے کی سفارتی کوششوں سے آگاہ کیا
