انصاف اب دور نہیں! ڈی آئی جی انویسٹیگیشن لاہور نے شہریوں کی شکایات پر موقع پر احکامات جاری کر دیے، تفتیشی افسران کی سرزنش

لاہور:(رپورٹ ملک ظہیر)لاہور میں وزیر اعلیٰ پنجاب کے ویژن کے مطابق دفتر ڈی آئی جی انویسٹیگیشن میں کھلی کچہری کا انعقاد کیا گیا، جس کی صدارت ڈی آئی جی انویسٹیگیشن سید ذیشان رضا نے کی۔ کھلی کچہری میں بڑی تعداد میں شہریوں نے شرکت کی اور اپنے مقدمات کی تفتیش سے متعلق شکایات پیش کیں۔ ڈی آئی جی سید ذیشان رضا نے شہریوں کی شکایات تفصیلاً سنیں اور متعدد معاملات پر موقع پر ہی احکامات جاری کیے۔ ناقص تفتیش پر چند کیسز کو تبدیلی تفتیش بورڈ کو مارک کیا گیا جبکہ متعلقہ تفتیشی افسران کو شوکاز نوٹس بھی جاری کیے گئے۔ بعض شکایات پر ایس پی سی آر او اور انچارج آئی آر سی کو باقاعدہ انکوائری کرنے کی ہدایات دی گئیں۔
ڈی آئی جی انویسٹیگیشن نے ڈویژنل ایس پیز انویسٹیگیشن سے فوری رابطہ کر کے متعلقہ مقدمات کی تفتیش میں تیزی اور شفافیت یقینی بنانے کے احکامات جاری کیے اور بعض کیسز میں فوری ازالے کا حکم دیا۔
اس موقع پر ڈی آئی جی سید ذیشان رضا کا کہنا تھا کہ مقدمات کی تفتیش کے حوالے سے عوام کی شکایات کا فوری اور مؤثر ازالہ کیا جا رہا ہے، عوام کے جان و مال کا تحفظ پولیس کی اولین ترجیح ہے۔ انہوں نے افسران کو ہدایت کی کہ شہریوں کے ساتھ خوش اخلاقی سے پیش آئیں اور اپنی کارکردگی کو مزید بہتر بنائیں۔ ڈی آئی جی انویسٹیگیشن نے واضح کیا کہ عوامی مسائل کے حل کے لیے ان کے دفتر کے دروازے ہمیشہ کھلے ہیں اور شفاف تفتیش کے ذریعے انصاف کی فراہمی کو ہر صورت یقینی بنایا جائے گا۔