2026 کرکٹ شائقین کیلئے بڑا سال، تین عالمی کپ، انڈر 19 ورلڈ کپ 15 جنوری سے کھیلا جائے گا

لندن:سال 2026 کرکٹ شائقین کے لیے  شاندار سال ،اس سال کل تین عالمی کپ کھیلے جائیں گے۔ انڈر 19 عالمی کپ پہلے کھیلا جائے گا۔ 2026 انڈر 19 عالمی کپ جمعرات 15 جنوری سے شروع ہو رہا ہے۔ آئی سی سی نے اس ٹورنامنٹ کے لیے بھارت اور پاکستان کو الگ الگ گروپس میں رکھا ہے۔ اس کا مطلب ہے کہ بھارت اور پاکستان ٹورنامنٹ کےلیگ مرحلے میں نہیں کھیلیں گے۔
2026 انڈر 19 عالمی کپ 15 جنوری سے 6 فروری تک زمبابوے اور نمیبیا میں مشترکہ طور پر کھیلا جائے گا۔ اس عالمی کپ میں سولہ ٹیمیں حصہ لے رہی ہیں جنہیں چار گروپس میں تقسیم کیا گیا ہے۔ بھارتی ٹیم ٹورنامنٹ کے لیگ مرحلے میں امریکا، بنگلہ دیش اور نیوزی لینڈ کے خلاف کھیلے گی۔
انڈر 19 عالمی کپ کے پہلے ہی دن یعنی پندرہ جنوری کو بھارت کا مقابلہ امریکا سے ہوگا۔ یہ میچ کوئنز اسپورٹس کلب، بلاوایو، زمبابوے میں پاکستانی وقت کے مطابق دوپہر 1:30 بجے شروع ہوگا۔ بھارت کا دوسرا میچ 17 جنوری کو بنگلہ دیش کے خلاف کھیلا جائے گا۔ یہ میچ کوئنز اسپورٹس کلب، بلاوایو، زمبابوے میں بھی کھیلا جائے گا، جو پاکستانی وقت کے مطابق دوپہر 1:30 بجے سے ہی شروع ہوگا۔ بھارت اور بنگلہ دیش کے درمیان موجودہ صورتحال کو دیکھتے ہوئے یہ میچ سنسنی خیز ہونے کی امید ہے۔ بھارت کا لیگ مرحلے کا تیسرا میچ 24 جنوری کو بلاوایو میں کھیلا جائے گا۔
گروپ میں سرفہرست دو ٹیمیں اگلے مرحلے کے لیے کوالیفائی کریں گی۔ دوسرے گروپس پر نظر ڈالیں تو گروپ بی میں پاکستان،ا سکاٹ لینڈ، زمبابوے اور انگلینڈ شامل ہیں۔ گروپ سی میں آسٹریلیا، جاپان، آئرلینڈ اور سری لنکا شامل ہیں۔ گروپ ڈی میں جنوبی افریقہ، تنزانیہ، افغانستان اور ویسٹ انڈیز شامل ہیں۔
2026 انڈر 19 عالمی کپ 16 واں ایڈیشن ہے۔ بھارت نے پانچ بار  جبکہ آسٹریلیا نے چار بار ٹائٹل جیتا ہے۔ پاکستان دو بار چیمپئن رہ چکا ہے۔ انگلینڈ، جنوبی افریقہ، ویسٹ انڈیز اور بنگلہ دیش بھی ایک ایک بار چیمپئن بن چکے ہیں۔ آسٹریلیا موجودہ چیمپئن ہے۔ 2024 کے فائنل میں آسٹریلیا نے بھارت کو 79 رنز سے شکست دے کر ٹائٹل اپنے نام کیا۔