برسبین :آسٹریلیا نے ایشیز سیریز کے دوسرے ڈے نائٹ ٹیسٹ میں انگلینڈ کو 8 وکٹوں سے شکست دے کر 5 میچوں کی سیریز میں 0-2 کی برتری حاصل کرلی ہے۔
میزبان ٹیم کی اس پوزیشن کو نہایت مضبوط اور انگلینڈ کے لیے خطرے کی گھنٹی قرار دیا جا رہا ہے۔میچ کے چوتھے روز انگلینڈ نے اپنی دوسری اننگز 134 رنز 6 کھلاڑی آؤٹ سے دوبارہ شروع کی، جبکہ وہ اب بھی 43 رنز کے خسارے میں تھا۔
کپتان بین اسٹوکس نے مزاحمت کرتے ہوئے 50 رنز کی اننگز کھیلی اور ول جیکس نے بھی 41 رنز بنا کر اہم کردار ادا کیا۔دونوں بلے بازوں کی بدولت انگلینڈ آسٹریلیا کو محض 65 رنز کا ہدف دینے میں کامیاب ہوا۔جواب میں آسٹریلیا نے مطلوبہ ہدف بآسانی 2 وکٹوں کے نقصان پر حاصل کرلیا۔ اسٹیو اسمتھ نے چھکا لگا کر میچ کا اختتام کیا اور ٹیم کو شاندار فتح دلاتے ہوئے انگلش کیمپ میں تشویش کی فضا گہری کر دی۔
ایشیز سیریز روایتی حریفوں آسٹریلیا اور انگلینڈ کے درمیان دنیا کی قدیم ترین اور سخت ترین ٹیسٹ کرکٹ رقابت سمجھی جاتی ہے۔
اس سیریز کے پہلے ٹیسٹ میں بھی آسٹریلیا نے عمدہ کارکردگی دکھاتے ہوئے کامیابی حاصل کی تھی، جس کے بعد اب 0-2 کی برتری نے انگلش ٹیم پر شدید دباؤ بڑھا دیا ہے۔انگلینڈ کو اگر سیریز میں واپسی کرنی ہے تو 17 دسمبر سے ایڈیلیڈ میں شروع ہونے والا تیسرا ٹیسٹ ان کے لیے فیصلہ کن حیثیت رکھتا ہے۔