لاہور: وزیراعلیٰ پنجاب مریم نوازشریف کی ہدایت پر پنجاب بھر میں کچرا ٹھکانے لگانے کے جدید منصوبے کے تحت رنگ دار کوڑے دان استعمال کرنے کا حکم جاری کر دیا گیا ہے۔ تمام بازاروں، شاپنگ مالز، تجارتی مراکز، سرکاری دفاتر اور تعلیمی اداروں میں الگ رنگ کے کوڑے دان لگائے جائیں گے۔
پیلے رنگ کے ڈبوں میں کاغذ اور پیکنگ کا سامان، سبز رنگ کے ڈبوں میں بوتلیں اور کانچ کے ٹکڑے، سُرمئی رنگ کے ڈبوں میں پھلوں کے چھلکے اور ضائع شدہ کھانا، لال رنگ کے ڈبوں میں دھات، اور نارنجی ڈبوں میں پلاسٹک کا کچرا جمع کیا جائے گا۔
رنگ دار کوڑے دان نہ لگانے کی خلاف ورزی پر ماحولیاتی تحفظ کے ادارے قانون کے مطابق کارروائی کی جائے گی۔ اس اقدام کا مقصد کچرے کی مقدار میں کمی اور ماحول دوست رویوں کو فروغ دینا ہے۔ تعلیمی ادارے پنجاب مینجمنٹ ہیلپ لائن (1139) پر رابطہ کر کے کچرا اٹھانے کی سہولت حاصل کر سکتے ہیں۔
لوکل گورنمنٹ اینڈ کمیونٹی ڈویلپمنٹ ڈیپارٹمنٹ انتظامات کو یقینی بنائے گا جبکہ ماحولیاتی تحفظ کا ادارہ حکم نامے پر عمل درآمد کی نگرانی کرے گا۔ اس اقدام سے پنجاب کو عالمی معیار کے مطابق صفائی کے اہداف کے قریب لانے کی کوشش کی جا رہی ہے۔