اسلام آباد:مسلم لیگ ن کے سینئر رہنما سینیٹر عرفان صدیقی کی نمازجنازہ اسلام آباد میں ادا کر دی گئی ۔نماز جنازہ میں وفاقی وزراء ، ارکان پارلیمنٹ اور زندگی کے مختلف شعبوں سے تعلق رکھنے والے افراد نے بڑی تعداد میں شرکت کی۔
مسلم لیگ ن کے سینئر رہنما سینیٹر عرفان صدیقی کی نماز جنازہ حافظ نسیم خلیل نے پڑھائی۔ نماز جنازہ میں مرحوم کے بیٹے عمران صدیقی، نعمان صدیقی ، بھائی شاہد صدیقی، وفاقی وزراء اعظم نذیر تارڑ، احسن اقبال، عطااللہ تارڑ، امیر مقام، ڈاکٹر طارق فضل چوہدری، حنیف عباسی،چوہدری سالک حسین،ڈپٹی چیئرمین سینیٹ سیدال خان ناصر،وزیر مملکت بلال اظہر کیانی، معاون خصوصی طارق فاطمی، پارلیمانی سیکرٹری دانیال چوہدری، ارکان پارلیمنٹ،مسلم لیگ ن کے کارکنوں،صحافیوں، ادیبوں، اساتذہ اور طلبہ سمیت مختلف مکاتب فکر کے افراد نے بڑی تعداد میں شرکت کی۔
شرکاء نے مرحوم عرفان صدیقی کی سیاسی، علمی اور صحافتی خدمات کو خراجِ عقیدت پیش کیا۔شرکاء نے کہا کہ سیاست، صحافت،تعلیم اور ادب کے شعبے میں مرحوم کی خدمات کو ہمیشہ یاد رکھا جائے گا۔مرحوم عرفان صدیقی کو ایچ الیون قبرستان میں سپرد خاک کیا گیا۔