سیالکوٹ (بیورو رپورٹ: سلیم احمد اعوان شیخو)
پولیس نے فوری اور مؤثر کارروائی کرتے ہوئے سمبڑیال میں سنیار سے چھینا گیا 7 کروڑ روپے مالیت کا 2 کلوگرام سے زائد سونا کامیابی کے ساتھ بازیاب کر لیا ہے۔
ڈسٹرکٹ پولیس آفیسر (ڈی پی او) سیالکوٹ کیپٹن (ر) دوست محمد کو سمبڑیال کے رہائشی سنیار وسیم عباس ولد کفایت اللہ کے گھر پر ڈکیتی کی بڑی واردات کی اطلاع موصول ہوئی۔ اطلاع ملتے ہی ڈی پی او کیپٹن (ر) دوست محمد نے فوری نوٹس لیتے ہوئے ڈی ایس پی سمبڑیال کو سخت احکامات جاری کیے۔
ڈی ایس پی سجاد احمد باجوہ اور ایس ایچ او سمبڑیال انسپکٹر میاں عبدالرزاق دیگر پولیس ٹیموں کے ہمراہ فوری طور پر جائے وقوعہ پر پہنچے، علاقے کا گھیراؤ کیا اور ملزمان کی تلاش کے لیے بڑے پیمانے پر سرچ آپریشن کا آغاز کر دیا۔
بتایا گیا ہے کہ سنیار وسیم عباس کے گھر کی چھت پر اس کا ملازم سونے اور چاندی کے خام مال کو پگھلانے کا کام کر رہا تھا کہ دو نامعلوم مسلح ڈاکو گھر کے عقب سے سیڑھی لگا کر اندر داخل ہوئے۔ ملزمان نے اسلحہ کے زور پر ملازم کو یرغمال بنایا اور 7 کروڑ روپے مالیت کے قیمتی سونے اور دیگر سامان پر مشتمل تھیلا چھین کر فرار ہو گئے۔
تاہم پولیس کی جانب سے فوری کارروائی اور مؤثر گھیراؤ کے باعث ڈاکو گرفتاری کے خوف سے تمام سونا اور تھیلا کھیتوں میں ہی پھینک کر فرار ہونے پر مجبور ہوگئے۔ پولیس ٹیم نے سرچ آپریشن کے دوران کھیتوں سے سونا اور تھیلا بحفاظت بازیاب کر لیا۔
پولیس نے مقدمہ درج کر کے فرار ہونے والے ڈاکوؤں کی شناخت اور گرفتاری کے لیے خصوصی ٹیمیں متحرک کر دی ہیں اور مختلف مقامات پر چھاپے مارے جا رہے ہیں۔