نیواڈا : اٹارنی جنرل ایرن فورڈ نے ریپبلکن گورنر جو لمبارڈو کو شکست دے کر ریاست کی تاریخ کے پہلے سیاہ فام گورنر کا اعزاز حاصل کر لیا!

نیواڈا:امریکی ریاست نیواڈا کے گورنر کے انتہائی سخت اور کانٹے دار مقابلے میں ڈیموکریٹک اٹارنی جنرل ایرن فورڈ نے موجودہ ریپبلکن گورنر جو لمبارڈو کو شکست دے کر تاریخی فتح حاصل کر لی ہے۔ اس فتح کے ساتھ ہی ایرن فورڈ نیواڈا کی تاریخ کے پہلے سیاہ فام گورنر بن گئے ہیں۔
نیواڈا میں حاصل کی گئی یہ کامیابی ڈیموکریٹک پارٹی کے لیے انتہائی اہمیت کی حامل سمجھی جا رہی ہے، کیونکہ اس سے اہم ترین بیٹل گراؤنڈ (کلیدی) ریاستوں کے ریاستی نظامِ حکومت پر ڈیموکریٹس کی گرفت مزید مضبوط ہو گئی ہے، جو آنے والے امریکی صدارتی انتخاب میں بھی فیصلہ کن کردار ادا کرے گی۔
ایرن فورڈ 2019 سے نیواڈا کے اعلیٰ ترین پراسیکیوٹر (اٹارنی جنرل) کے طور پر خدمات انجام دے رہے ہیں۔ اپنی مہم کے دوران انہوں نے عوامی اور معاشی مسائل پر توجہ مرکوز کی۔
فورڈ نے بچپن میں غربت، بھوک اور نامساعد حالات کا مقابلہ کرنے سے لے کر ریاضی کے استاد اور پھر قانون کی ڈگری حاصل کرنے تک کے اپنے سفر کو مہم کا حصہ بنایا۔
اپنے منشور میں انہوں نے طلبہ کے تعلیمی قرضوں (Student Loan Debt) میں کمی اور مہنگائی کو کنٹرول کرنے کا وعدہ کیا۔مصنوئی ذہانت (AI) ڈیٹا سینٹرز پر پابندیاں: عوام میں آرٹیفیشل انٹیلی جنس ڈیٹا سینٹرز کے بڑھتے اثرات پر تشویش کو مدنظر رکھتے ہوئے فورڈ نے نئے ٹیکس بریک روکنے اور وفاقی زمینوں پر ان کے منصوبوں کی مخالفت کا اعلان کیا۔
جبکہ فورڈ نے گورنر لمبارڈو کو کارپوریٹ ہاؤسنگ اور اسکولوں میں مفت کھانا فراہم کرنے والی قانون سازی کو ویٹو کرنے پر شدید تنقید کا نشانہ بنایا۔
انتخابی مہم کے دوران ایرن فورڈ کو ڈیموکریٹک پارٹی کی مرکزی قیادت کی بھرپور حمایت حاصل رہی، جن میں کیلیفورنیا کے گورنر گیون نیوزم اور سابق نائب صدر کاملا ہیرس شامل ہیں، جنہوں نے نیواڈا کا دورہ کر کے ان کے لیے مہم چلائی۔
فورڈ نے موجودہ گورنر کے تمام الزامات کا دفاع کرتے ہوئے نیواڈا کے عوام کی معاشی اور سماجی بہتری کو اپنی حکومت کی اولین ترجیح قرار دیا ہے۔